قازاقستان ازاماتشاسى ا. كۇشەنوۆا ا ق ش-تا قاماۋعا الىندى - ق ر س ءى م تۇسىنىكتەمەسى

استانا. قازاقپارات - ا ق ش-تا قازاقستان ازاماتشاسى ا. كۇشەنوۆا قاماۋعا الىندى. ق ر سىرتقى ىستەر مينيسترلىگى ۆەدومستۆونىڭ باسپا ءسوز حاتشىسى نۇرجان ايتماحانوۆتىڭ قاماۋعا الىنعان ا. كۇشەنوۆاعا قاتىستى بەرگەن تۇسىنىكتەمەسىن تاراتتى.

اسيا كۇشەنوۆا فلوريدا شتاتىندا (ا ق ش) لەون گرافتىعىندا 5- تامىز كۇنى قاماۋعا الىنعان. فلوريدا شتاتىنىڭ پوليتسەيلەرى بەرگەن جاۋاپتا ءبىزدىڭ وتانداسىمىز «ءۇي يەسىنىڭ كەلىسىمىنسىز جەكە مۇلىكتە تۇرعانى ءۇشىن» جانە «اياعى اۋىر ايەلگە قول كوتەرگەنى» ءۇشىن اباقتىعا توعىتىلعان. ول سونىمەن قاتار ا ق ش-تىڭ كوشى-قون زاڭىن بۇزدى دەپ ايىپتالىپ وتىر.

قازىرگى ۋاقىتتا ا. كۇشەنوۆا «Leon County Jail» تۇرمەسىندە. وعان مەتيۋ ۋيليامس ەسىمدى مەملەكەتتىك ادۆوكات تاعايىندالعان. ونىڭ ءىسى بويىنشا سوت وتىرىسى 26- تامىزدا بولادى.

بۇنىڭ الدىندا ا ق ش- تاعى قازاقستان ەلشىلىگىنىڭ كونسۋلدىق ءبولىمىنىڭ كەڭەسى بويىنشا، ا. كۇشەنوۆا قازاقستانعا ورالۋ جونىندە كۋالىكتى الۋعا ءوتىنىش بەرگەن. ونىڭ ارىزى ماقۇلدانعان، دەگەنمەن حاتتا جىبەرگەن ادامنىڭ مەكەنجايى كورسەتىلمەگەن.

بۇل تۋرالى ا. كۇشەنوۆانىڭ اناسى گۇلسايرا ءجۇنىسوۆاعا حاباردار ەتىلگەن. 2013 -جىلدىڭ وزىندە ءجۇنىسوۆا قازاقستان ەلشىلىگىنە ا ق ش-تاعى بالاسىنا كومەك بەرۋىن وتىنگەن. ا. كۇشەنوۆانىڭ جاعدايىنا بايلانىستى وعان ەلگە ورالۋعا كەڭەس بەرىلدى. الايدا ول ءۇزىلدى-كەسىلدى قارسىلىق تانىتتى.

سول ۋاقىتتان بەرى ا ق ش-تاعى قازاقستان ەلشىلىگى ا. كۇشەنوۆانىڭ اناسىمەن ءاردايىم بايلانىستا بولدى. وعان ا ق ش-تاعى قازاقستان كونسۋلىنىڭ تەلەفون ءنومىرى دە بەرىلگەن.

ق ر سىرتقى ىستەر مينيسترلىگى ا. كۇشەنوۆانىڭ جاعدايىن ءجىتى باقىلاۋدا ۇستاماق جانە ول ازاماتشاعا كونسۋلدىق-قۇقىقتىق كومەك كورسەتىپ وتىرادى.

اۆتور: جاسۇلان جولدىبايەۆ