جالاڭاش قوعام ءھام قازاق ايەلىنىڭ قادىرى
ال قازىر نە بولدى؟ كىم قاي جەرىن كورسەتەمىن دەسە دە ءوزى بىلەدى. ولارعا قاراپ سويلەسەڭ «مەنىڭ ەركىم وزىمدە» دەپ ۇرسىپ بەرەدى. كەسەتىن بۇرىم قالمادى. شەشەتىن كيىم قالمادى. قايدا قاراساڭ دا ءوز اۋرەتىن سانگە ايىرباستاعان قىزدار.
بالا- شاعانى سىرتقا الىپ سەرۋەندەۋگە شىعا المايتىن بولدىق. كىرەرگە تەسىك تاپپاي قالاسىڭ. اۋىلدارعا دا وسى جالاڭاشتىق دەرتى جەتتى. شەت ەلدىڭ فيلمدەرىن ساتىپ الۋدىڭ قاجەتى جوق، ينتەرنەت سايراپ تۇر. بالەنىڭ ءبارى سوندا. بىرەۋدىڭ قاڭسىعى مادەنيەت بولىپ قالىپتاسىپ جاتىر. تاستارعا تابىنعان ۇندىستەردىڭ اۋەنى مەن داستۇرىنە ابدەن قانىعىپ الدىق. ودان سايىن كورە بەرگىمىز كەلەدى. ورىستاردىڭ سەريالدارى تىپتەن سوراقى. گولليۆۋد ونىمدەرىندەگى كورىنىستەر شەكارادان شىعىپ كەتتى. جان- جاقتان كەلىپ قۇيىلىپ جاتىر، قۇيىلىپ جاتىر. توقتايتىن ءتۇرى جوق. ىشكەن سايىن شولدەيمىز. تاعى سۇرايمىز.
قازاق وتباسىلارىنداعى ايەلدىڭ قادىرى ءتۇستى. قازىر جانجال كوپ. اجىراسۋ كوپ. ۇيات ازايعان جەردە ۇياتسىز تىرلىكتەر كوبەيدى. ءسان قۋعان قاتىندار ابدەن قۇتىردى. ءىشىپ، ماس بولعانى بىلاي تۇرسىن، كوشەدە قۇلاپ، ەسىنەن ايىرىلىپ جاتقاندارى قانشاما؟ ولاردىڭ قىزدارى قىدىرىپ كەلەمىن دەپ ءجۇرىپ ابىرويىنان ايىرىلىپ قالۋدا. اكەلەر ۇساقتالدى. اقىر سوڭىندا اق نەكەنىڭ قادىرى قاشىپ، بەرەكەسى كەتتى.
تال تۇستە، تەمىر جول ۆوكزالىنىڭ الدىندا جىنىستىق قاتىناس جاساپ جاتقان جابايىلاردى دا كوردىك. بۇل استانادا بولعان وقيعا. ءدال وسىنداي تاعى ءتورت وقيعا اقتاۋ قالاسىندا دا تىركەلدى. بۇلاي قۇتىرىپ جۇرگەندەر - 18-25 جاس ارالىعىنداعى جاستار. بۇلار ءارى كەتسە 15 كۇنگە قاماۋعا الىنادى. سوسىن ادەپكى ىستەرىنە قايتا ورالماي ما؟ !
جالاڭاش قوعامنىڭ اراسىندا ءجۇرىپ ادامنىڭ بۇلىنبەي ءجۇرۋى قيىن. قۇدايدان قورىققان پەندە عانا وسى قوعامنىڭ تۇسىنىگىنە قارسى جۇزەدى. كىمدە- كىم ار- نامىسىن قورعاشتاپ، ءوز وتباسىن، اۋلەتىن ءتۇرلى بالەلەردەن امان الىپ قالامىن دەسە قاتتى تىرىسۋ كەرەك بولىپ تۇر.
سەرجان اماندىق. جاڭاوزەن قالاسى.
«نامىس»
