مەملەكەت باسشىسىنىڭ قاراۋىنا قازاقستانداعى كاسىپكەرلىكتىڭ حال- احۋالى تۋرالى بايانداما ۇسىنىلماق

استانا. قازاقپارات - ۇلتتىق كاسىپكەرلەر پالاتاسى مەملەكەت باسشىسىنا قازاقستانداعى كاسىپكەرلىكتىڭ حال- احۋالى تۋرالى بايانداما ۇسىنادى.

 بۇل تۋرالى بۇگىن ورتالىق كوممۋنيكاتسيالار قىزمەتىندە وتكەن بريفينگتە پالاتانىڭ باسقارما ءتوراعاسى ابىلاي مىرزاحمەتوۆ ءمالىم ەتتى.

«كەلەسى جىلى ءساۋىر ايىندا ۇلتتىق ينۆەستورلار كەڭەسىندە ۇلتتىق كاسىپكەرلەر پالاتاسى مەملەكەت باسشىسىنا قازاقستانداعى كاسىپكەرلىكتىڭ حال- احۋالى تۋرالى بايانداما ۇسىنادى دەپ جوسپارلانۋدا. وندا جەرگىلىكتى جەرلەردەگى اكىمدەردىڭ رەيتينگى، كاسىپكەرلەردىڭ مەملەكەتتىك ورگاندارعا بەرگەن باعاسى، مەملەكەتتىك قولداۋ باعدارلامالارىن جۇزەگە اسىرۋ دەڭگەيى قامتىلادى. قازىرگى ۋاقىتتا ونداي ۇجۇمىس جاسالۋدا. ىلكى جوبا رەتىندە اقمولا جانە قاراعاندى وبلىستارىندا ىسكەرلىك كليماتتىڭ دەڭگەيى ساراپتالۋدا» ، - دەدى ول.

 ونىڭ سوزىنە قاراعاندا، بۇگىندە ۇلتتىق كاسىپكەرلەر پالاتاسىنا جەر- جەردەن كاسىپكەرلەردىڭ 15 مىڭعا تارتا ارىز- شاعىمدارى كەلىپ تۇسكەن. ونىڭ 3 مىڭى پالاتانىڭ ورتالىق اپپاراتىنا جولدانىپتى. ايتا كەتۋ كەرەك، سونىڭ ىشىندە 4/1 ءى كاسىپكەرلەردىڭ قۇقىقتارىن بۇزۋعا قاتىستى. ەڭ كوپ ساۋال جەر قاتىناستارىنا قاتىستى ءتۇسىپ جاتىر.

 «جەرگە بايلانىستى اۋداندىق، قالالىق جانە وبلىستىق اكىمدىكتەردىڭ زاڭسىز ارەكەتتەرىنە كوڭىل تولماۋشىلىق بار. جەرلەردىڭ ۇلەستىرىلۋ پروتسەسىنىڭ اشىق وتپەۋىنە قاتىستى شاعىمدانادى. دەگەنمەن، بۇل ماسەلە كەشە ب. ساعىنتايەۆتىڭ بايانداماسىندا اتاپ كورسەتىلگەنىندەي، شەشىمىن تاباتىن بولادى. كۇزدە زاڭعا جاڭا وزگەرىستەر ەنگىزىلەدى. جاڭا زاڭ بويىنشا، كاسىپكەر نەمەسە جەكە تۇلعا جەر تەلىمىن الۋعا ەلەكتروندى تۇردە ءوتىنىش تاستايدى جانە مەملەكەتتىك ورگاندارمەن بەتپە- بەت تۇيىسپەيدى. باس جوسپاراعا سايكەس كەلە مە، كەلمەي مە، بوس جەر تەلىمى بار ما، جوق پا، ينفراقۇرىلىم جۇرگىزىلگەن بە، مونوپوليستەرمەن اراداعى كەلىسىم جۇرگىزۋ - وسىنىڭ بارلىعىن اكىمدىكتىڭ جەر قاتىناستارى جونىندەگى ءبولىمى اينالىسادى. ەلەكتروندى وتىنىشكە ءبىر ايدىڭ ىشىندە جاۋاپ قايىرۋلارى ءتيىس» ، - دەيدى ا. مىرزاحمەتوۆ.

 

 اۆتور: جاسۇلان جولدىبايەۆ