الماتىدا ۇزدىك تاۋار وندىرۋشىلەر انىقتالدى

الماتى. قازاقپارات - الماتىدا «قازاقستاننىڭ ۇزدىك تاۋارى» بايقاۋىنىڭ جەڭىمپازدارى انىقتالدى.

سالتاناتتى ماراپاتتاۋ شاراسىنا قالا باسشىسى احمەتجان ەسىموۆ قاتىستى. كوشباسشىلاردى انىقتاۋ «ۇزدىك ازىق-تۇلىك تاۋارى»، «ۇزدىك حالىق تۇتىنۋ تاۋارى»، «وندىرىستىك باعىتتاعى ۇزدىك تاۋار» اتالىمدارى بويىنشا انىقتالدى.

كورمە- بايقاۋعا 100 گە تارتا كاسىپورىن قاتىسىپ، باق سىنادى.

2014- جىلعى الماتىداعى «ۇزدىك ازىق- تۇلىك تاۋارى» رەتىندە «Caspian Beverage Holding» پەن «سينكاز» ج ش س تانىلسا، حالىققا ارنالعان ۇزدىك تاۋار رەتىندە «رتسم ماكپال» ج ش س مەن «Viva Pharm» كومپانياسى تانىلدى.

ال وندىرىستىك باعىتتاعى ۇزدىك تاۋارى اتالىمىنا «الماتينسكيي زاۆود موستوۆىح كونسترۋكتسي» ج ش س مەن «كەلەت» ا ق ونىمدەرى لايىق دەپ تانىلدى.

«بۇل تاۋارلاردىڭ بارلىعى سىرتقا ەكسپورتتاۋعا بەيىمدەلگەن. وزدەرىڭىزگە بەلگىلى 1- قاڭتاردان باستاپ ە ا ە ك قۇرامىنا كىرەمىز. الدا تاعى د س ۇ-عا كىرۋ جوسپارلانىپ وتىر. ءبىزدىڭ تاۋار وندىرۋشىلەرگە باسەكەلەستىك قابىلەتىن ارتتىرۋ كەرەك. وتاندىق تاۋارلاردىڭ ساپاسىن ارتتىرۋ قاجەت. مەن ويلايمىن، بۇل جەڭىمپازداردىڭ قاي-قايسىسى بولسىن قازاقستاننىڭ ۇزدىك تاۋارى اتاۋىنا لايىق. ولار استانادا وتەتىن شەشۋشى بايقاۋدا جۇلدەلى ورىنعا يە بولادى دەپ سەنەمىن»، - دەدى قالا باسشىسى احمەتجان ەسىموۆ.

«قازاقستاننىڭ ۇزدىك تاۋارى» رەسپۋبليكالىق بايقاۋى استانادا كۇزدە وتپەك.

اۆتور: گۇلميرا عوسمانالي