قازاقستان مەن رەسەيدىڭ كوشى-قون ورگاندارىنىڭ مالىمەتتەر بازاسى بىرىكتىرىلۋى مۇمكىن
بۇل تۋرالى بۇگىن استانادا ءوتىپ جاتقان قازاقستان مەن رەسەي فەدەراتسياسى شەكارالاس پروكۋراتۋرالارى باسشىلارىنىڭ ەكى كۇندىك فورۋمىندا قازاقستان باس پروكۋراتۋراسى ءبىرىنشى دەپارتامەنتى باسشىسىنىڭ ورىنباسارى نۇرداۋلەت سۇيىندىكوۆ مالىمدەدى.
«ءبىز تۇراقتى تۇردە قارىم-قاتىناس جاساپ، اقپاراتتارمەن الماسىپ تۇراتىن وكىلەتتى تۇلعالاردى بەلگىلەپ قويۋدى ۇسىنامىز. سونداي-اق، ءبىز كوشى-قون سالاسىنداعى پروكۋرورلىق باقىلاۋدىڭ نەگىزگى ماسەلەلەرى بويىنشا جانە شەتەل ازاماتتارىن ەلدەن شىعارۋ، ولاردىڭ قوزعالىسىن قاداعالاۋدى كۇشەيتۋ سياقتى شارۋالار بويىنشا تاجىريبەمەن بولىسۋگە مۇددەلىمىز»، - دەدى ول.
ن. سۇيىندىكوۆتىڭ ايتۋىنشا، ەگەر كوشى-قون ورگاندارىنىڭ مالىمەتتەر بازاسى بىرىكتىرىلسە، ازاماتتىققا تاپسىرعان ادامنىڭ باسقا ەلدە ازاماتتىعى بار ەكەنى بىردەن شىعىپ كەلەدى جانە اتالعان ادام قازاقستان ازاماتتىعىنان باس تارتپايىنشا، رەسەي ازاماتتىعىن الا المايتىن بولادى.
«قازىر مۇنداي جاعدايدىڭ الدىن الۋ مۇمكىن ەمەس، ويكەنى رەسەي جاعى ءبىزدىڭ مالىمەتتەردى كورە المايدى، ال ءبىز ولاردىكىن كورۋگە مۇمكىندىگىمىز جوق»، - دەدى ول.
اۆتور: ءابۋ-اسقار مەكەش ۇلى
