قازاقستان مەن رەسەي پروكۋراتۋرالارى اراسىندا ارنايى قورعالعان بايلانىس ارناسى اشىلۋى مۇمكىن

 استانا. قازاقپارات - قازاقستان مەن رەسەي پروكۋراتۋرالارى اراسىندا تىكەلەي بايلانىس ارناسى قۇرىلۋى مۇمكىن. بۇل تۋرالى بۇگىن استانادا ءوز جۇمىسىن باستاعان قازاقستانمەن رەسەيدىڭ شەكارالاس پروكۋراتۋرالارى باسشىلارىنىڭ ەكى كۇندىك فورۋمى اياسىندا ق ر باس پروكۋرورى اسحات داۋىلبايەۆ ايتتى.

«قىلمىستىق ىستەر بويىنشا قۇقىقتىق كومەك كورسەتۋ بارىسىندا كورشىلەس ەلدەردىڭ اۋماقتىق پروكۋراتۋرالارى اراسىنداعى تىكەلەي بايلانىس جاساۋ قاجەتتىلىگى تۋرالى ويلار بىرنەشە رەت كوتەرىلگەن بولاتىن. بۇل قۇقىقتىق كومەك كورسەتۋ تۋرالى سۇرانىستاردى شەكارالاس مەملەكەتتىڭ وڭىرلىك پروكۋراتۋراسىنا تىكەلەي جولداۋعا جانە ولاردى ورىنداۋ مەرزىمىن ەداۋىر قىسقارتۋعا مۇمكىندىك بەرەدى. قازىرگى تاڭدا وسىنداي تاپسىرمالاردى ورىنداۋ مەرزىمى كەم دەگەندە 3 ايدى قۇرايدى. بۇل رەتتە تاپسىرمانى ورىنداۋ ەمەس، ولاردى پوشتامەن جەتكىزۋ ۋاقىتتىڭ كوپ بولىگىن الادى. كۇردەلى مەملەكەتارالىق بيۋروكراتيالىق راسىمدەر قىلمىسكەرلەرگە قىلمىستىق قۋدالاۋدان جاسىرىنۋعا جانە قىلمىستىڭ زاتتارى مەن ايعاقتارىن جويۋعا مۇمكىندىك بەرەدى. سوندىقتان بىرلەسە وتىرىپ، سۇرانىستار مەن اتقارىلعان ماتەريالداردى جىبەرۋ ءۇشىن ارنايى قورعالعان بايلانىس ارناسىن اشۋ مۇمكىندىگىن قاراستىرۋدى ۇسىنامىن» ، - دەپ اتاپ ءوتتى ول.

ونىڭ ايتۋىنشا، جوعارىدا كورسەتىلگەن كەدەرگىلەر اسىرەسە مال ۇرلاپ، شەكارا اسىرىپ كەتەتىندەردىڭ قىلمىسىن اشۋدا قولبايلاۋ بولىپ وتىر.

«مۇنداي قىلمىستاردى ءىزىن سۋىتپاي اشۋ ءۇشىن ورتالىق ورگاندار ارقىلى رۇقسات الۋ كوپ ۋاقىتقا سوزىلادى. وسى ۋاقىتتا قىلمىسكەرلەر شەكارا ماڭىنداعى اۋماقتاردا بوي تاسالاپ جاتىپ، قىلمىستارىنىڭ ءىزىن جاسىرىپ ۇلگەرەدى. مۇنداي پروبلەمالار سىزدەردە دە بار شىعار دەپ ويلايمىن» ، - دەدى ول رەسەيلىك ارىپتەستەرىنە.

 اۆتور: ءابۋ- اسقار مەكەش ۇلى