شىمكەنت كوشەلەرىنە كۇننەن قۋات الاتىن جول بەلگىلەرى ورناتىلدى

استانا. قازاقپارات - شىمكەنتتە جول بەلگىلەرى كۇننىڭ كوزىنەن قۋات الىپ، جۇمىس جاسايتىن بولدى. ەندى كولىك جۇرگىزۋشىلەرى ءتۇن ورتاسىندا دا جول بەلگىلەرىن الىستان انىق كورە الادى.

ال ەڭ باستىسى، بۇل بەلگىلەر قالالىق ەلەكتر جەلىسىنە تاۋەلدى ەمەس. كوشە بويىنداعى كوزگە ۇراتىن جول بەلگىلەرى جۇرگىزۋشىلەرگە الدا جاياۋ جۇرگىنشىنىڭ جولى بار ەكەنىن ەسكە سالادى. كۇن قۋاتىنان ءنار الاتىن ارنايى جارىقتانعان بەلگى كۇندىز-ءتۇنى جۇمىسىن توقتاتپايدى.

ونىڭ قىزمەتىنە بۇگىندە جۇرگىزۋشىلەر مەن جاياۋ جۇرگىنشىلەر وڭ باعاسىن بەرىپ تە ۇلگەردى. باتارەيالار كۇندىز كۇن كوزىنەن قۋات الىپ، كەش باتقاندا جول بەلگىلەرىن جارىقتاندىرىپ تۇرادى. كۇن ساۋلەسىمەن قىزمەت ەتەتىن بەلگىلەر مۇندا رەسەيدەن جەتكىزىلگەن، دەپ حابارلايدى و ق و اكىمىنىڭ باسپا ءسوز قىزمەتىنەن.

«جولاۋشىلاردىڭ قاۋىپسىزدىگىن قامتاماسىز ەتۋ ماقساتىندا قالاداعى جاياۋ جۇرگىنشىلەردىڭ وتكەلىنە كۇن باتارەيالارىمەن جۇمىس ىستەيتىن 90 جول بەلگىسى ورناتىلدى. وعان قالالىق بيۋجەتتەن 28 ميلليون تەڭگە بولىنگەن»، - دەيدى شىمكەنت قالالىق جولاۋشىلار كولىگى جانە اۆتوموبيل جولدارى ءبولىمىنىڭ قىزمەتكەرى ناۋرىز سۇگىراليەۆ.