ەلباسى «سامۇرىق-قازىنا» مەنەدجەرلەرىنىڭ بىلىكسىزدىگىن قاتاڭ سىنعا الدى

استانا. قازاقپارات - بۇگىن اقوردادا وتكەن ۇكىمەتتىڭ كەڭەيتىلگەن وتىرىسىندا ەلباسى نۇرسۇلتان نازاربايەۆ «سامۇرىق-قازىنا» ۇ ءا ق» ا ق-ىندا باس مەنەدجەرلەر بولىپ تاجىريبەسىز ماماندار تاعايىندالاتىنىن سىنادى.

«سامۇرىققا كىم بولسا، سونى قابىلدايدى. ءتىپتى مەكتەپتى قازىر عانا بىتىرگەن قىزداردى باس مەنەدجەر دەپ اتايدى. سىزدەردىڭ ءارقايسىلارىڭىز مەملەكەتتىك ادامسىزدار عوي، نەگە ءوز مينيسترلىكتەرىڭىزدى، ۆەدومستۆولارىڭىزدى قاراپ، ءتارتىپ ورناتپايسىزدار»، - دەدى ن. نازاربايەۆ.

سونىمەن قاتار ەلباسى مەملەكەتتىك ۆەدومستۆو باسشىلارىنا جۇمىسقا كاسىبي ماماندار قابىلداۋ قاجەتتىگىن باسا ايتتى.

«قىسقارتىڭىزدار دا، 10 ادامنىڭ ىشىندەگى جۇمىس ىستەيتىن ناعىز كاسىبي مامانعا اقشا تولەڭىزدەر. مەن باسشىلىقتىڭ ەڭ تومەنىنەن باستاپ بارلىق جولىنان ءوتتىم جانە ءبارىن دە بىلەمىن. ەگەر بولىمدە 10 ادام جۇمىس ىستەيتىن بولسا، وندا وسى 10 نىڭ تەك ەكەۋى عانا تىنباي ەڭبەكتەنەدى، الدە بۇل وتىرىك پە؟ كىم جۇمىس ىستەيدى، سونىڭ موينىنا ءمىنىپ الادى»، - دەدى مەملەكەت باسشىسى.

اۆتور: مارلان جيەمباي