مەرۋەرت تۇسىپبايەۆا: ءدال تۋعان كۇنىمدە فيلمگە ءتۇسۋ باقىت
- مەرۋەرت، بىرىنشىدەن تۋعان كۇنىڭىز قۇتتى بولسىن! ءسىزدىڭ ءدال وسى تۋعان كۇنىڭىزدە فيلمگە ءتۇسىپ جاتقانىڭىزدى ەستىدىك. بۇعان دەيىن بىردە ءبىر فيلمگە قاتىسپاعانىڭىزدى دا بىلەمىز. قانداي فيلمگە ءتۇسىپ جاتقانىڭىز تىڭدارماندارىڭىزعا قىزىق بولاتىن شىعار؟
- ءيا، كوپتەن بەرى ۇسىنىستار ءتۇسىپ جاتتى. ءبىراق كەيبىر ۇسىنىستاردى ءوزىم جاقسى قابىلداعىم كەلمەدى. سەبەبى ەپيزودتارعا عانا تۇسۋگە شاقىردى، ءتىپتى كەيبىر رەجيسسەرلەر جالاڭاش تۇسىرەتىن ساحنالارعا شاقىردى. مۇنداي رولدەر وزىمە ۇنامايتىن ەدى. سوندىقتان دا فيلمگە ءتۇسۋ تۋرالى ۇسىنىستاردىڭ ءبىرىن دە قابىل المادىم.
«ەكى ارىستىڭ ورتاسىندا»
- فيلمگە ءتۇسۋ يدەياسى قايدان شىقتى؟ تەلەحيكايا رەجيسەرى كىم؟ بۇل جوبامەن قانداي كومپانيا اينالىسۋدا؟
- فەيسبۋكتەگى دوسىم قاناعات مۇستافينمەن سويلەسىپ وتىرىپ ءوزىنىڭ كوپ فيلمدەرىن ءتۇسىرىپ جۇرگەنىن ايتىپ قالدى. تاياۋدا ول ءوزىنىڭ «قاراشاڭىراق» اتتى فيلمىن تۇسىرگەن بولاتىن. سول الەۋمەتتىك جەلىدە سويلەسىپ وتىرىپ، وعان قاشان فيلمگە تۇسۋگە شاقىراسىڭ، مىنا توي- تومالاقتان شارشادىق قوي دەپ ءازىل-قالجىڭى ارالاس حابارلاما جىبەردىم. سول ساتتەن ول فيلمگە شاقىراتىنىن ايتتى، مىنە، قازىر ءوز سوزىندە تۇرىپ فيلمگە شاقىردى. ونىڭ «قانايدار» پروديۋسەرلىك ورتالىعى 15 تەلەحيكايادان تۇراتىن جوبا دايىنداپ جاتىر. سول تەلەحيكايادا حالىققا قىزمەت كورسەتۋ ورتالىعىنىڭ باسشىسىنىڭ ءرولىن سومدايمىن. مەنىڭ كەيىپكەرىم ءومىرىن جۇمىسقا ارناعان، جالعىز ىلىكتى، وتباسى جوق ايەل. جۇمىس ورنىن ءوز ۇيىندەي كورەتىن ادامنىڭ ءرولىن سومدايتىنىمدى عانا ايتا الامىن. فيلمنىڭ قاشان شىعاتىنى جايلى جانە قالاي اتالاتىنى جايلى ءبىز ازىرگە ايتا المايمىز.
- فيلمدە ايەل ادامنىڭ وبرازىن سومدايمىن دەدىڭىز. جاس كەزىڭىزدە فيلمگە تۇسپەي، كەش ءتۇسىپ جاتىرمىن دەپ ويلامايسىز با؟
- جۋرناليستەردىڭ كوپ قوياتىن سۇراقتارىنىڭ ءبىرى وسى فيلمگە كوپ تۇسپەيتىنىم جايلى. ءبىراق مەن پەرىنىڭ قىزى ەمەسپىن. 20 جاستاعى مەرۋەرت پەن قىرىقتان اسقان مەرۋەرتتىڭ بىردەي بولۋى مۇمكىن ەمەس، ارينە. ءبىراق، قۇدايعا شۇكىر، كينوعا كەش ءتۇسىپ جاتىرمىن دەپ ويلامايمىن. ءبىز ەندى ءانشى بولعاندىقتان بەينەكليپ تە تۇسىرەمىز، فيلمگە دە تۇسە بەرەمىز. جاقسىلىقتىڭ ەرتە-كەشى جوق.
- فيلم ءدال تۋعان كۇنىڭىزدە ءتۇسىرىلىپ جاتقاندىقتان توسىن سىيلار مەن جاڭالىقتار كوپ شىعار؟
- بۇگىنگى جۇمىس وتە ادەمى جۇمىس دەپ ويلايمىن. ءومىرىمنىڭ ماڭىزدى كۇنىن جۇمىستا وتىرىپ وتكىزگەنىم ءۇشىن، ونەرمەن بىرگە وتكىزگەنىم ءۇشىن ءوزىمدى باقىتتى سانايمىن. بۇگىن تاڭ اتپاي، ساعات جەتىدە ومىرىمدەگى ەڭ قىمبات ادام ماعان ۇلكەن شوق گۇلىن سىيلادى. ودان كەيىن تۋعان-تۋىستارىم قۇتتىقتاپ، ءتىپتى الەۋمەتتىك جەلىدەگى پاراقشاما كەرەمەتتەي قۇتتىقتاۋ تىلەكتەر كەلىپ جاتىر. ال كەشكە جاقىن ادامدارىمىزبەن وتىرىس جاسايمىز. باستىسى پاۆلوداردان مەنىڭ انام ارنايى كەلىپتى. وسى قۋانىشتاردىڭ بارلىعى دا ءبىر كۇندە بولاتىنى مەنى نەگە وكىندىرۋى كەرەك؟ بۇل مەن ءۇشىن باقىت.
- ومىرىڭىزدەگى ەڭ قىمبات ادام تۋرالى وقىرمان بىلگىسى كەلەتىن شىعار؟ الداعى ۋاقىتتا ومىرىڭىزدە وزگەرىستەر بولا ما؟
- بۇل سۇراققا ومىرىمدە الداعى ۋاقىتتا جاقسى وزگەرىستەر كۇتىپ تۇر دەپ قانا جاۋاپ بەرەيىن. سەبەبى ۋاقىتتىڭ ەنشىسىندەگى وزگەرىستەر تۋرالى ايتۋ تىم ەرتە. سول وزگەرىستەر بولعان كۇنى سىزدەرگە ەڭ ءبىرىنشى بولىپ حابارلاسۋعا ۋادە بەرەمىن.
- كەلىستىك! اڭگىمەڭىزگە راقمەت!
اڭگىمەلەسكەن: ارداق قۇلتاي
ماسساگەت
