اقوردادا ەلباسىنىڭ قاتىسۋىمەن ءماسىموۆ ۇكىمەتىنىڭ جۇمىسى قورىتىندىلانۋدا

استانا. قازاقپارات - بۇگىن اقوردادا ۇكىمەتتىڭ كەڭەيتىلگەن وتىرىسى ءوتىپ جاتىر. وعان ق ر پرەزيدەنتى نۇرسۇلتان نازاربايەۆ ءتوراعالىق ەتۋدە.

«ۇكىمەتتىڭ اعىمداعى جىلعى باستى مىندەتتەرى ايقىندالىپ، شەشىمدەر قابىلداندى. بۇل - بيىلعى جولداۋدا ايتىلعان 2050 گە دەيىنگى باعدارلاما. ءبىز وسى باعىتتا وتىز وركەندەگەن ەلدىڭ قاتارىنان كورىنۋىمىز كەرەك. بارلىق وڭىرلەردى مەنىڭ تاپسىرماممەن ۇكىمەت باسشىسى ارالاپ شىقتى، اكىمدەرمەن كەزدەستى.

باعدارلامالار بەكىتىلدى، يندۋستريالىق جوسپارلار بار. دۇنيەدە بولىپ جاتقان الماعايىپ زاماندا، ونىڭ ىشىندە ت م د ەلدەرىندە ورىن العان وقيعالار اياسىندا ءبىز دە بارلىق ماسەلەلەردى ساراپتان وتكىزىپ تۇرۋعا ءتيىسپىز. قازاقستانعا وسىنداي وقيعالاردىڭ قيىندىعى تيەدى، ول قاي باعىتتا تيەدى، ونىڭ الدىن الۋ ءۇشىن نە ىستەۋ كەرەك؟ ەڭ نەگىزگى ماسەلە ەكونوميكانى وركەندەتۋدى جولعا قويۋىمىز كەرەك. بۇگىن نەگىزگى اڭگىمە وسى جايىندا بولادى»، - دەدى جيىندى اشقان ەلباسى ن. نازاربايەۆ.

سونىمەن قاتار، پرەزيدەنت جاڭا پرەمەردىڭ قىزمەتىنە ءبىر توقسان وتكەنىن، سونىڭ قورىتىندىسى جاسالاتىنىن اتاپ ءوتىپ، الداعى ۋاقىتتا نە ىستەلەتىنى تالقىلانىپ، ورتاق شەشىم قابىلداناتىنىن ايتتى.

اۆتور: قانات مامەتقازى ۇلى