ادامنىڭ ينسترۋكتسياسى - قاسيەتتى قۇران

 استانا.قازاقپارات - ادام ۇيىنە قانداي دا ءبىر جيھاز نە تەحنيكا الاتىن بولسا، ونىڭ جانىندا مىندەتتى تۇردە نۇسقاۋى، ياعني ينسترۋكتسياسى بولادى. ول العان دۇنيەسىنىڭ قالاي قولدانىلۋىن سودان ۇيرەنەدى.

ەگەر نۇسقاۋى بويىنشا جۇرمەسە، العان دۇنيەسى دۇرىس ىستەمەۋى مۇمكىن، كەيدە ءتىپتى جانىپ كەتىپ تە جاتادى. سول سەبەپتى، قانداي دا ءبىر نارسە جاسالعاندا ونىڭ جانىندا مىندەتتى تۇردە ينسترۋكتسياسى دا قوسا جازىلادى. دەمەك، ادام دا سولاي. ادامدى جاراتقان اللا ونىڭ ينسترۋكتسياسىن دا قوسا جازعان. ادامنىڭ ينسترۋكتسياسى -  قاسيەتتى قۇران مەن پايعامبارىمىزدىڭ حاديستەرى. ءبىز وسى ەكەۋىن باسشىلىققا الا وتىرىپ جاسايمىز، ياعني وسى ەكى نۇسقاۋ بويىنشا ءومىر سۇرەمىز. ايتپەسە، نۇسقاۋسىز قولدانىلعان تەحنيكانىڭ ىستەن شىققانى سەكىلدى، ادام دا تۋرا جولدان تايادى. نە جيھازىمىز جانىپ كەتكەندەي، ادام دا وتقا ورانۋى مۇمكىن. سول سەبەپتى، ءبىز دە اللانىڭ ينسترۋكتسياسىمەن جۇرگەنىمىز ءجون. مۇسىلمان بولىپ جاراتىلعاندىقتان مۇسىلمانشىلىققا ساي ءومىر ءسۇرۋىمىز كەرەك.

بىردە ءبىر حريستيان پوپى مەن مۇسىلمان يمامى اڭگىمەلەسىپ وتىرىپ، ءبىر- بىرىنەن كۇنىنە قانشا رەت قۇلشىلىق قىلاتىندارىن سۇراسىپتى. حريستيان ايتىپتى: «ءبىز جەكسەنبى سايىن شىركەۋگە جينالىپ اپتادا ءبىر رەت قۇلشىلىق قىلامىز» ، - دەپتى. كەزەك مۇسىلمانعا كەلگەندە: ء«بىز كۇنىنە 24 ساعات قۇلشىلىق قىلامىز» ، - دەپتى. ازىلدەپ تۇر ما دەگەندەي پوپ سەنىڭكىرەمەپتى. «سوندا ۇيىقتامايسىڭدار ما، تاماق جەمەيسىڭدەر مە، دارەتحاناعا بارمايسىڭدار ما؟ » ، - دەپ سۇراپتى ازىلدەپ تۇر ما دەگەندەي. مۇسىلمان: « ءبىز ءسىز ايتقاندارىڭىزدىڭ ءبارىن ىستەيمىز، تەك پايعامبارىمىز ۇيرەتكەندەي ىستەيمىز. ۇيىقتاساق، پايعامبارىمىز ۇيرەتكەن دۇعانى وقىپ ۇيىقتايمىز. ول بىزگە «ۇيىقتادى» دەپ ەمەس، «قۇلشىلىق قىلدى» دەپ جازىلادى. تاماق ىشسەك، پايعامبارىمىز ۇيرەتكەندەي ىشەمىز، ول دا بىزگە «تاماق ءىشتى» دەپ ەمەس، قۇلشىلىق بولىپ جازىلادى، ساۋاپ بولادى» ، - دەگەن ەكەن. دەمەك، سىز بەن ءبىز دە تاۋلىگىمىزدىڭ 24 ساعاتىن قۇلشىلىققا اينالدىرا الادى ەكەنبىز. سول سەبەپتى، سىزدەرگە «24 ساعات قۇلشىلىقتىڭ» ينسترۋكتسياسىن ۇسىنباقشىمىز. ياعني، ادامنىڭ تاڭەرتەڭ تۇرعاننان كەش باتقانعا دەيىنگى كۇندەلىكتى دۇعالاردى جازباقپىز. ەندەشە، اۋەلى ۇيقىدان ويانعان ساتتەن باستايىق.

ۇيقىدان ويانعاندا ءار مۇسىلماننىڭ وقيتىن دۇعاسى مىناۋ بولۋى ءتيىس: «ولگەننەن كەيىن قايتا تىرىلتكەن اللاعا ماقتاۋ- ماداق، شۇكىرلەر بولسىن! بارشامىز اللانىڭ قۇزىرىنا قايتامىز» . وقىلۋى: « ءالحامدۋليللاھي ءاللازي احيانا با'دا ءما ءاماتانا ءۋا ءيلايھين- نۋشۋر» .

 دىنىمىزدە «ۇيقى -  كىشى ءولىم» سانالادى. اللا تاعالا ادام ۇيقىعا كەتكەن كەزدە رۋحىن ءوز تاراپىنا الادى. ودان كەيىن قۇران اياتىنان بىلەتىنىمىزدەي، قالاعانىن قايتارادى، قالاعانىن ۇستاپ قالادى. ونى ۇيقىدان ويانباي قالىپ جاتاتىنداردان دا كورىپ جاتامىز. «ادامنان جان شىعاردا ونى اللا الادى. ولمەگەندەردىڭ جانىن ۇيقىدا جاتقاندا الادى: دەمەك، كىم ولىمگە بۇيىرىلسا، ونىڭ جانىن ۇستاپ قالادى دا (جانىن الادى دا) ، باسقالارىنىڭ جاندارىن بەلگىلەنگەن ۋاقىتقا دەيىن (اجالدارى جەتكەنگە دەيىن) قويا بەرەدى. ويلى ادام ءۇشىن مۇندا كوپ عالامات بار» ، -  دەيدى اللا قۇران كارىمدە (زۋمار سۇرەسى، 42-ايات) .

مىنە، سول سەبەپتى دە، مۇسىلمان تاڭەرتەڭ امان- ەسەن كوزىن اشقانىنا، جانىنىڭ كەۋدەسىنە امان قايتىپ كەلگەنىن شۇكىر ايتىپ، اللانى ماداقتاۋى ءتيىس. بۇل كۇنىمىزدىڭ بەرەكەلى باستالۋىنا سەبەپ بولادى.

 

اۆتور: اقجىگىت قارامەڭدى

«الاش ايناسى»