ءجۇرسىن ەرمان ەر جانىبەك باتىرعا ارنالعان ءمۇشايرانىڭ جەڭىمپازى اتاندى
ءمۇشايرادا ەلىمىزدىڭ بەلگىلى اقىندارىنان باستاپ، جاس تالانتتارعا دەيىن باق سىناستى.
جىر دوداسىندا سەكسەننەن استام ۇمىتكەردىڭ قاتارىندا موڭعوليادان، قىتايدان تانىمال اقىنداردىڭ بولۋى ءمۇشايرا دەڭگەيىن كوتەرىپ، اۋقىمىن كەڭەيتە ءتۇستى.
بايگە قورجىنىنا كەلىپ تۇسكەن تۋىندىلاردىڭ ىشىندە باتىر بولمىسىن جان-جاقتى سومداعان كولەمدى پوەمالار دا، تولىمدى تولعاۋلار دا، ورنەكتى ولەڭدەر دە بولدى. الايدا، بايگە جەڭىمپازدارىن انىقتاۋ قازىلار القاسىنا وڭاي بولمادى.
سەبەبى كوپشىلىك اقىندار باتىرعا قاتىستى كونە اڭىزداردىڭ اياسىنان شىعا الماي، تاريحي وقيعالاردى بايانداۋدان اسا الماي، ءبىرىن ءبىرى قايتالاۋعا ۇرىنعان. ايتالىق، كوك دونەن مەن اق تۋعا قاتىستى ولەڭدەردىڭ ءوزى 30 دان استى. ساراپشىلار مۇنداي ءبىرسارىندى ولەڭدەردىڭ ىشىنەن تاڭداۋلىلارىن عانا سۇرىپتاپ الدى.
ەر جانىبەكتىڭ تاريحي تۇلعاسىن جىرلاي وتىرىپ، بۇگىنگى كۇننىڭ بيىگىنەن ءسوز ايتا بىلگەن، زامان تىنىسىن، قوعام كەلبەتىن تەرەڭنەن قوزعاعان كوركەم تۋىندىلاردى باستى نازاردا ۇستادى.
سونىمەن، بىلىكتى عالىمدار مەن تانىمال اقىنداردان قۇرالعان، ق ر مەملەكەتتىك سىيلىعىنىڭ لاۋرەاتى، اقىن نەسىپبەك ايت ۇلى ءتوراعالىق ەتكەن قازىلار القاسى ساراپتاپ سارالاي كەلە تومەندەگىدەي ۇيعارىمعا كەلدى:
باس جۇلدەنى (تەمىر تۇلپار) - «ەرلىك جىرى» اتتى ولەڭىمەن قازاقتىڭ ارقالى اقىنى، الاش سىيلىعىنىڭ يەگەرى ءجۇرسىن ەرمان جەڭىپ الدى.
ءبىرىنشى ورىن الماتىلىق تانىمال اقىن باقىتبەك ءبامىش ۇلىنىڭ «رۋح جىرى - ەر جانىبەك» پوەماسىنا بەرىلدى.
ەكىنشى ورىنداردى «ەر جانىبەك» ولەڭىمەن وسكەمەندىك ازامات تاسقارا جانە «جانىبەك - ەر جانىبەك - ءبي جانىبەك» داستانىمەن جەزقازعاندىق كەنجەباي احمەتوۆ ەنشىلەدى.
ءۇشىنشى ورىنداردى موڭعوليالىق سۇراعان راحمەت ۇلى «جارقا ەلبرۋسى»، «كيە» اتتى ولەڭدەرى ءۇشىن، استانالىق اقبەرەن ەلگەزەك «ەر جانىبەك، ەر جانىبەك!» تولعاۋى ءۇشىن، وسكەمەندىك اسكەرحان اقتاي «قىرلاۋلى نايزا قولعا العان» تولعاۋى ءۇشىن يەلەندى.
ىنتالاندىرۋ سىيلىقتارى ش ق و-تىق ايجارىق ءابىلحاسىموۆتىڭ «ەل قورعانى - ەر جانىبەك» پوەماسىنا، ماڭعىستاۋلىق جاس اقىن ەدىلبەك دۇسەنوۆتىڭ «ەر جانىبەك» تولعاۋىنا، استانالىق باۋىرجان قاراعىز ۇلىنىڭ «ەر جانىبەك رۋحىنا» ولەڭىنە، اتىراۋلىق ءاليا داۋلەتبايەۆانىڭ «جانىبەكتىڭ اق تۋىن جوقتاۋ» ولەڭىنە، الماتىلىق ماقسۇتحان باركول-دالەيدىڭ «ارۋاعىڭ اۋناسىن» تەرمە-تولعاۋىنا بۇيىردى.
سونىمەن بىرگە سەمەي قالاسىنىڭ اكىمى ايبەك كارىموۆ، شاكارىم اتىنداعى سەمەي مەملەكەتتىك ۋنيۆەرسيتەتى جانە «ەر جانىبەك» قورى تاعايىنداعان سىيلىقتاردى ەگەۋحان ءمۇحامادي قىزى (ش ق و)، قايرات كامەي (ق ح ر)، ەرلان ءجۇنىس (استانا)، ادالبەك ءاقمادي ۇلى (الماتى)، تولىباي ابىلايەۆ ( قىزىلوردا) قاتارلى اقىندار قانجىعاسىنا بايلاندى.
جۇلدەگەرلەردى ماراپاتتاۋ ءراسىمى وسكەمەن قالاسىندا وتەدى. ۋاقىتى قوسىمشا حابارلانادى.
BAQ. KZ
