جەكي چان(شىڭ لۇڭ) جەكە ۇشاعىن حالىققا كورسەتتى - فوتو

استانا. قازاقپارات - اتاقتى ءارتىس، كاسكادەر، كينورەجيسسەر، پروديۋسەر، سەناريست، ءانشى جەكي چان ءوزىنىڭ جەكە ۇشاعىن حالىققا كورسەتتى.

Legacy 650 دەپ اتالاتىن جەكە ۇشاقتىڭ باعاسى 200 ميلليون يۋان(شامامەن 32 ميلليون ا ق ش دوللارى) تۇرادى. ۇشاق ىشىندە VIP اسحانا، توڭازىتۋ بولمەسى جانە سۋسىندىقتار مەن شاراپ ساقتاۋعا ارنالعان بولمە دە بار. ۇشاقتىڭ ءبىر رەت اۋەگە كوتەرىلۋىنە 50-80 مىڭ ا ق ش دوللارى قارجى جۇمسالادى ەكەن.

كوركەم ديزاينى كوزدىڭ جاۋىن الاتىن ۇشاق 13 ادامعا ارنالعان. تەك وسى ۇشاقتا عانا قىزمەت اتقاراتىن اۋە قىزمەتكەرى، اسپازدار، داياشىلار جۇمىس اتقارادى. جەكي چان ب ا ق وكىلدەرىنە جەكە ۇشاق ساتىپ الۋداعى ەڭ باستى ماقساتى ونىڭ كوزدەگەن جەرگە جەتۋ ءۇشىن ۋاقىت ۇنەمدەۋ ەكەندىگىن ايتتى.

سونىمەن بىرگە جەكي چان: «بۇل مەنىڭ ونەردەگى دوستارىمدى كۇتىپ الۋعا دا كوپ مۇمكىندىك بەرەدى» دەدى. ۇشاق ءارتۇرلى باعىتقا جول الاردا ونى تىركەۋ، ۋاقىتى مەن جيىلىگىنە رۇقسات الۋ قاجەت دەدى ول تىلشىلەر قاۋىمىنا.

ەستەرىڭىزگە سالا كەتەيىك، جەكي چان 1954 - جىلى 7 - ساۋىردە گونكونگ(شياڭگاڭ) قالاسىندا كەدەي وتباسىندا دۇنيەگە كەلگەن. 1971 - جىلى اكادەميانى ءبىتىرىپ، كينوداعى جولىن كاسكادەرلىكتەن باستاعان قايتپاس قايسار جەكي چان اكتەرلىك ومىردە دە نەبىر اسا قاۋىپتى تريۋكتەردى ءوزى ورىنداپ، باسىن تالاي قاتەرگە تىككەن.

ەكى ومىرتقاسىن، مۇرنىن، اياعى مەن قولىن دا تالاي سىندىرىپ، كەڭىردەگىن جارالاپ، كوزىنەن دە ايىرىلىپ قالا جازداعان. ءتىپتى باس سۇيەگىن دە سىندىرىپ، ولىمنەن قالعانىن جۇرت بىلە بەرمەيدى.

سونىمەن قاتار جەكي چان ءانشى، كوپتەگەن كينولارىنداعى اندەردى ءوزى ورىنداعان، 80 -جىلداردان باستاپ قازىرگى كۇنگە دەيىن 20 البومدى اندەر جيناعىن شىعارعان. ءبىراق، قالىڭ جۇرت جەكي چاندى ءانشى رەتىندە ەمەس، ءارتىس رەتىندە تانيدى.

edda.kz