بوكستان قازاقستاننىڭ ۇلتتىق قۇراما كومانداسى بۇكىلالەمدىك بوكس اكادەمياسىندا وقۋ-جاتتىعۋ جيىنىن وتكىزەدى
بۇل جيىنعا ۇلتتىق قۇراما كوماندانىڭ بارلىق ءۇش قۇرامى مەن رەسپۋبليكا وڭىرلەرىنەن بولاشاعىنان ءۇمىت كۇتتىرەتىن تاعى جيىرماعا جۋىق جاس بوكسشىلار قاتىسادى.
مىرزاعالي ايتجانوۆتىڭ شاكىرتتەرى جالپى دەنە دايارلىعى بويىنشا وقۋ-جاتتىعۋ جيىنىن جاقسى كوڭىل-كۇيدە باستاماق. وتكەن شىلدە ايىندا ۇلتتىق قۇراما كوماندا تۇركيادا ساۋىقتىرۋ جيىنىن وتكىزگەن بولاتىن.
«بۇل ساۋىقتىرۋ جيىنى وتە جاقسى ءوتتى. وزدەرىڭىز بىلەسىزدەر، بوكسشىلارىمىز بيىلعى جىلدىڭ العاشقى جارتىسىندا كوپتەگەن ماڭىزدى تۋرنيرلەرگە قاتىستى. سوندىقتان كومانداعا دەمالىس كەرەك بولدى. ءبىراق ارينە جىگىتتەر تۇركياعا ءجاي تۋريست رەتىندە بارعان جوق. مۇندا ولار ترەناجەرلىك زالدا كۇن سايىن ءار ءتۇرلى جاتتىعۋلار جاسادى. سپورتتىق ويىندارعا قاتىستى. تەڭىزدە شومىلدى. ءبىر سوزبەن ايتقاندا جىگىتتەر جاقسى دەمالىپ قايتتى. ەندى الداعى بولاتىن دايىندىق جۇمىستارىنا جاڭا كۇش-قۋاتپەن قۇلشىنا كىرىسەتىن بولادى» - دەدى ءوز سوزىندە بوكستان قازاقستان ۇلتتىق قۇراما كومانداسىنىڭ باس باپكەرى مىرزاعالي ايتجانوۆ.
ەستەرىڭىزگە سالا كەتەيىك، ۇستىمىزدەگى جىلدىڭ 19- قىركۇيەگى مەن 4- قازانى ارالىعىندا وڭتۇستىك كورەيانىڭ ينچحون قالاسىندا XVII ازيا ويىندارى بولادى. وعان 45 ەلدەن 12 مىڭنان استام ادام قاتىسادى دەپ كۇتىلۋدە. مۇندا سپورتشىلار سپورتتىڭ 36 تۇرىنەن جۇلدەلى ورىنداردى ساراپقا سالادى.
اۆتور: جاپپاربەرگەن ايبوتا
