پاۆلودار تۇرعىنى قولا ءداۋىرى ادامىنىڭ قاڭقاسىن تاپتى
مىرزابەك سەيتاحمەتوۆ كونە داۋىردەن جەتكەن سۇيەكتەردى ءوز اۋلاسىنان تاپقان. "اۋلادا قوقىس توگەتىن شۇڭقىر قازعان كەزدە، 1,5 مەتر تەرەڭدىكتەن ادامنىڭ قاڭقاسى شىقتى. سۇيەكتەردىڭ قاسىندا شاقپاققا ۇقساس ەكى زات پەن التى اسىق جاتتى. ماعان مۇنىڭ قانداي مولا ەكەنىن ءبىلۋ قىزىق بولىپ كەتتى"، - دەيدى ول.
تۇرعىن جەرگىلىكتى ولكەتانۋ مۇراجايىنىڭ قىزمەتكەرلەرىنە تابىلعان سۇيەك جايلى حابارلاعان. ماماندار قاڭقانىڭ ءتورت مىڭ جىل بۇرىن جەرلەنگەنىن انىقتادى.
"مولا ءبىزدىڭ داۋىرىمىزگە دەيىنگى 16-15 - عاسىرلارعا، ياعني ەرتە قولا داۋىرىنەن اندرونوۆ كەزەڭىنە دەيىنگى ۋاقىتقا جاتادى. وكىنىشكە قاراي، سۇيەكتەر ناشار ساقتالعان. ءبىراق تىستەرىنە قاراعاندا، بۇل - 60-65 جاستاعى ەر ادام. قابىرىندە ەشقانداي كەراميكا بۇيىمداردىڭ بولماعانىنا قاراعاندا، بۇل - قاراپايىم ادام. تابىلعان قالدىقتار اقپاراتتىق ماتەريال رەتىندە عىلىم ءۇشىن تاريحي قۇندىلىققا يە. ونىڭ ۇستىنە، بۇل ءقابىر ەرتە قولا داۋىرىنە جاتادى، ال ول كەزەڭنىڭ جادىگەرلەرى تىم از"، - دەيدى پاۆلودار وبلىستىق ولكەتانۋ مۇراجايىنىڭ عىلىمي قىزمەتكەرى گەورگي پەرەسۆەتوۆ.
عالىمنىڭ ايتۋىنشا، قاڭقا تابىلعان جەر ادامدار جاپپاي جەرلەنگەن ۇلكەن زيرات بولۋى مۇمكىن. "قولا داۋىرىندە ادامداردى ءبىر-بىرلەپ جەرلەمەگەن. وتباسىلىق، رۋلىق زيراتتار بولعان، ياعني مىنا سۇيەكتىڭ قاسىندا باسقا دا قابىرلەردىڭ بارىنا كۇمان جوق. ەكى جىل بۇرىن وسى وڭىردەن سول ءداۋىردىڭ قورىمىنىڭ ورنى تابىلدى، ءبىراق ول جەردەن كەراميكا بۇيىمدار شىققان بولاتىن"، - دەيدى پەرەسۆەتوۆ. ونىڭ ايتۋىنشا، بۇل ماڭدا جەر تەلىمدەرى تۇرعىن ءۇي قۇرىلىسى ءۇشىن بەرىلە باستاعالى بەرى جەر استىنان كونە ادامدار سۇيەكتەرى تابىلىپ جاتىر.
ەسكە سالا كەتەيىك، وسىنداي جاعداي 2011 - جىلى دا بولعان ەدى. پاۆلودار وبلىسى لەبياجى اۋدانىنداعى قىلىقوعام اۋىلىنىڭ تۇرعىنى ەرلان جۇماحانوۆ ءوز اۋلاسىندا دارەتحانا شۇڭقىرىن قازىپ جاتقان كەزدە، ەكى مەتر تەرەڭدىكتەن بالشىقتان سوعىلعان قۇمىرا مەن قولا ءداۋىرى ادامىنىڭ سۇيەگىن تاپقان.
