ەلباسى ۇكىمەتتىڭ جاڭا قۇرامىنىڭ جۇمىسىنا ساتتىلىك تىلەدى

استانا. قازاقپارات - بۇگىن اقوردادا وتكەن ۇكىمەتتىڭ كەڭەيتىلگەن وتىرىسى بارىسىندا اتقارۋشى بيلىكتىڭ جاڭارتىلعان قۇرامىن ايقىنداعان ق ر پرەزيدەنتى ن. نازاربايەۆ الداعى جۇمىسقا ساتتىلىك تىلەدى.

«تۇرمىستى شالىقتاتىپ، تىرشىلىكتى تۇزەتىن تەك - بەيبىت ءومىر، ادال ەڭبەك. جاسامپاز ىستەر تاتۋلىق پەن تۇراقتىلىق ارقىلى عانا جاسالادى. باردى بار عىپ، قۇندىلىقتى قادىرلەۋ ءاربىر ازاماتتىڭ مىندەتى. ەل بىرلىگى - ەڭ اسىل قازىنا، ەڭ اسىل قاسيەت. وسى اسىل قازىنانى كوزدىڭ قاراشىعىنداي ساقتاۋ تۇتاس قازاق ەلىنىڭ الدىنداعى ۇلى پارىز»، - دەدى ن. نازاربايەۆ.

سونىمەن قاتار، ەلباسى «قازاقستان-2050» باعىتىندا ايقىندالعان ماڭگىلىك ەل بولۋ جولىندا حالىقتىڭ بۇگىنگى باعىتى جالعاساتىنىن اتاپ ءوتتى.

«وسىندا وتىرعان بارشامىز، سونداي-اق بارلىق قازاقستاندىقتار ەلدىڭ ەرتەڭى ءۇشىن جۇمىس ىستەسەك، سوندا عانا ماقساتىمىزعا جەتەمىز. باعدارلامالار بەكىتىلدى، تاپسىرمالار ايقىن. ەندى تەك جۇمىس ىستەۋ كەرەك. ەندەشە ساتتىلىك تىلەيمىن. بارلىق قالعان جۇمىستاردى كارىم قاجىمقان ۇلى تياناقتى تۇردە قاراپ شىعاتىن بولادى. مينيسترلىكتەر مەن ۆەدومستۆولاردىڭ الداعى ماسەلەسىن دە شەشەدى. ۇكىمەت ەش كەدەرگىسىز جۇمىس ىستەۋىنە ءتيىستى شەشىمدەر قابىلدايدى دەپ سەنەمىن»، - دەدى مەملەكەت باسشىسى.

اۆتور: قانات مامەتقازى ۇلى