ماماندىقتى قالاي تاڭداۋ كەرەك؟
مىنە، سەنىڭ دە قاي ماماندىقتى تاڭدايتىنىڭ جانە ونى تاڭداعان كەزدە قاتەلەسپەۋ كەرەك ەكەنىن ويلايتىن كەز كەلدى.
كاسىبي بولاشاعىڭدى دۇرىس تاڭداۋ قوعامداعى ءوز ورنىڭدى تانۋدىڭ نەگىزى.
ادامنىڭ جاقسى، ومىرلىك تابىسقا جەتۋىنە اسەر ەتەتىن ەڭ ءبىر ماڭىزدى شەشىمدەردىڭ ءبىرى بولىپ تابىلادى.
ءوز ءىسىڭدى تاڭدار الدىندا قانداي ماماندىقتار بار ەكەندىگىن جانە بۇل ماماندىقتىڭ نە ءۇشىن كەرەك ەكەندىگىن ءبىلىپ ال. ماماندىق جايلى تولىق تۇسىنىك الۋ ءۇشىن: «مامان يەسى نە ىستەيدى؟»، «ونىڭ قىزمەتىنىڭ ناتيجەسى نەگە الىپ كەلەدى؟»، «مامان يەسى قانداي جاعدايدا جۇمىس ىستەيدى؟» دەگەن سۇراقتارعا جاۋاپ تابۋ كەرەك.
كاسىبي قىزمەتتىڭ ناتيجەسى - كەز كەلگەن جۇمىستىڭ نەگىزى. ءبىزدىڭ ومىردە نەگە قول جەتكىزگىمىز كەلەتىنى تۋرالى تۇسىنىكتىڭ ءوزى ءبىزدىڭ ارمانىمىزعا جەتۋگە مۇمكىندىك بەرەدى. ارينە، ماماندىق تاڭداعاندا مامانعا تەك قانا ءبىلىمى مەن ىسكەرلىگى عانا ەمەس، سونداي-اق ونىڭ قابىلەتى مەن جەكە قاسيەتتەرىن دامىتۋ دەڭگەيى جاعىنان دا قانداي تالاپتار قويىلاتىنىن ءبىلۋ ماڭىزدى.
مۇنداي اقپاراتتاردى قايدان الۋعا بولادى؟ ءوز ماماندىعى تۋرالى كاسىبي مامان عانا جاقسى ايتىپ بەرە الادى. ماماندىق تاڭداۋ الدىندا كەز كەلگەن جاس ءوسپىرىم بەلگىلى ءبىر ماماندىقتىڭ يەسى بولىپ تابىلاتىن ەرەسەك ادامداردىڭ قاسىندا بولادى. ولاردىڭ ءوز ماماندىقتارى تۋرالى قىزىقتى اڭگىمەلەرى جاس ءوسپىرىمدى قىزمەت سالاسىنداعى بەلگىلى ءبىر قىزىعۋشىلىقتى دامىتۋدىڭ سەبەپكەرى بولۋى مۇمكىن.
سونىمەن قاتار، مامانداردى ج و و-دا، كوللەدجدەردە، تەحنيكۋمداردا جانە باسقا دا مامانداردى دايىندايتىن كاسىبي وقۋ ورىندارىنان تابۋعا بولادى. ولارمەن قالاي كەزدەسۋ كەرەك؟ ەڭ قاراپايىم ءتاسىل - اشىق ەسىك كۇندەرىنە كەلىپ، ءوزىڭدى قىزىقتىرعان فاكۋلتەت دەكاناتىنىڭ، كافەدرانىڭ قىزمەتكەرلەرىنەن ءتيىستى اقپارات الۋ. سونىمەن قاتار، ج و و-نىڭ كاسىبي قىزمەت تۋرالى، سول ماماندىق بويىنشا وقۋدىڭ ەرەكشەلىكتەرى تۋرالى ناقتى اقپارات بەرە الاتىن قىزمەتكەرلەرىمەن جەكە كەزدەسۋ جونىندە كەلىسۋىڭىزگە بولادى.
ەندى تاڭدالعان ماماندىقتىڭ باعىتى تۋرالى تۇسىنىك. بىرنەشە ماماندىق بويىنشا وسىنداي تۇسىنىك الىپ، وزىڭە نە ۇنايتىنىن، نەنىڭ ۇنامايتىنىن، نەمەن ساتتىلىككە جەتەتىنىڭدى، نەمەن جەتە المايتىندىعىڭدى شەشەسىڭ. ماماندىقتار تۋرالى اقپاراتتى قانشالىقتى كوپ جيناساڭ، ولشەسەڭ، سوعۇرلىم تاڭداۋىڭ ناقتى جانە تۇسىنىكتى بولادى.
ماماندىق تاڭداۋدىڭ ءتيىمدى تاسىلدەرىنىڭ ءبىرى - مەكتەپتەگى دەمالىس ۋاقىتىندا كاسىپورىنداردا تاجىريبەدەن ءوتۋ. بۇل ءتاسىل ماماندىق تۋرالى شىنايى تۇسىنىك الۋعا مۇمكىندىك بەرەدى.
ايتپاقشى، سەن ءوزىڭنىڭ بولاشاق ماماندىعىڭدى تاڭداماس بۇرىن تاعى دا ءبىر وتە ماڭىزدى سۇراققا جاۋاپ بەرۋگە ءتيىسسىڭ: «بۇل جۇمىس ماعان نە بەرەدى؟». كوپشىلىگى جوعارعى ەڭبەكاقى العىلارى كەلەدى. شىندىعىندا، كەيدە ول دا جۇمىستان ادام كۇتكەندەي قۋانىش سىيلامايدى، ويتكەنى ادامعا دامۋ، جاڭاشىلدىققا ۇمتىلۋ ءتان. وزگەرىسكە دەگەن ۇمتىلىسىڭ قانشالىقتى كۇشتى بولسا، سونشالىقتى تۇلعالىق جانە كاسىبي ءوسۋ ءۇشىن ءوز جۇمىسىڭنان مۇمكىندىكتەردى كوپ تاباسىڭ.
ال ماماندىق الىپ، كاسىپتى يگەرۋ ءۇشىن وقۋ ورنىن تاڭداۋ كەرەك ەكەنى تۇسىنىكتى. بۇل جەردە نەگە نازار اۋدارۋ كەرەك؟ كەز كەلگەن وقۋ ورنىنىڭ باستى قۇندىلىعى ونىڭ وقىتۋشىلىق قۇرامى بولىپ تابىلادى. مامانداردى قالاي دايىنداپ شىعاراتىندىقتارى ونىڭ كاسىبي شەبەرلىگىنە بايلانىستى ەكەندىگى ساعان بەلگىلى. ساباق كەستەلەرىمەن دە تانىسقان ءجون. ولاردا كورسەتىلگەن پاندەر، سونداي- اق ولاردىڭ ءارقايسىسىنا بولىنگەن ساعات ساندارى اتالعان فاكۋلتەت ۇسىناتىن ءبىلىمنىڭ كولەمىن باعالاۋعا مۇمكىندىك بەرەدى.
وقۋ پروتسەسىنىڭ تەحنيكالىق جانە ماتەريالدىق جابدىقتالۋىنا دا (كىتاپحانا، كومپيۋتەرلىك سىنىپتار، ارنايى جابدىقتالعان بولمەلەر جانە ت. ب.) نازار اۋدارعان ءجون. ستۋدەنتتەردىڭ، اسىرەسە وسى وقۋ ورنىنىڭ تۇلەكتەرىنىڭ پىكىرىن تىڭداۋ كەرەك.
ماماندىق تاڭداۋ - قيىن جانە ەڭبەكتى قاجەت ەتەتىن ءىس جانە ءسىز قانشالىقتى ىزدەنسەڭىز، ناتيجەسى دە سوعۇرلىم جاقسى بولادى. ماماندىق الەمىمەن تانىسۋدى 5-6 - سىنىپتان باستاعان ءتيىمدى.
ەستە ساقتاڭىز! ادام جان دۇنيەسىنىڭ قالاۋىنا ساي كەلەتىن سالادا تابىسقا جەتەدى. سوندىقتان ماماندىقتى تاڭداعاندا نەمەن اينالىسقان قىزىقتى، نەمەن اينالىسقاندا جان راحاتىنا بولەنەسىز، سوعان نازار اۋدارعان ءجون.
ماماندىق - بۇل ءسىزدىڭ اقىلمەن سۇرەتىن ءومىرىڭىز. ءوزىڭىزدى قىزىقتىرعان سالانى قورعاي ءبىلىڭىز جانە سونىمەن بىرگە ءوزىڭىز دە دامىڭىز، سوندا عانا بيىككە جەتەسىز!
«نۇر وتان» ح د پ قولداۋىمەن جازىلعان «ومىرلىك 100 جاعداي» كىتابىنان ءۇزىندى.
el.kz
