قازاقستان اسكەرى رەسەيدەگى تانك بياتلونى چەمپيوناتىنا قاتىسۋدا - فوتو

استانا. قازاقپارات - بۇگىن رەسەي فەدەراتسياسىنىڭ «الابينو» پوليگونىندا تانك بياتلونى چەمپيوناتى سالتاناتتى تۇردە اشىلدى. بۇل تۋرالى ق ر قورعانىس مينيسترلىگىنىڭ باسپا ءسوز قىزمەتىنەن حابارلادى.

وعان قورعانىس ءمينيسترىنىڭ ءبىرىنشى ورىنباسارى - ق ر ق ك باس شتابىنىڭ باستىعى گەنەرال-پولكوۆنيك س. جاسۇزاقوۆ قاتىستى.

چەمپيونات بارىسىندا الەمنىڭ 12 ەلىنەن كەلگەن تانكيستەر كاسىبي شەبەرلىكتەرىن، جاۋىنگەرلىك ماشىقتارى مەن كوماندانىڭ تۇتاستىعىن پاش ەتەدى.

قازاقستان اتىنان «وڭتۇستىك»، «باتىس» جانە «شىعىس» وڭىرلىك قولباسشىلىقتارىنىڭ اسكەري قىزمەتشىلەرى قاتىسادى.

4 تانك ەكيپاجىنان تۇراتىن ءبىزدىڭ كوماندا سايىس شارتتارىنا سايكەس جاۋىنگەرلىك كولىكتى جۇرگىزۋ جانە ءار ءتۇرلى قاشىقتىقتارداعى نىسانالاردى جويۋ بويىنشا شەبەرلىكتەرىن كورسەتۋگە ءازىر.

الەم چەمپيوناتى 4 كەزەڭنەن تۇرادى: جەكە جارىس، سپرينت جانە ىزىنە ءتۇسىپ جارىسۋ، سپورتتىق كەزەڭ، ەستافەتا.

ۇيىمداستىرۋشىلاردىڭ ايتۋىنشا، وتكەن جىلمەن سالىستىرعاندا پوليگوننىڭ جولدارى كۇردەلەنە تۇسكەن، ءجۇرىپ ءوتۋ قاشىقتىعى 21 شاقىرىمعا دەيىن ۇلعايتىلعان، سونداي-اق ماشينا مانيەۆر جاساۋعا ءتيىس قىراتتار مەن تانككە قارسى بوگەتتەر قوسىلدى. ەكيپاجدار بەلگىلەنگەن باعداردان اۋىتقىعان جاعدايدا ايىپ سەكۋندتارى قوسىلادى.

تانك بياتلونى - بۇل بۇكىلارميالىق سايىس قانا ەمەس، سونىمەن قاتار تانك بولىمشەلەرىنىڭ قازىرگى زامانعى ۇرىسقا دايىندىعىن تەكسەرۋ بولىپ تابىلادى.

تانك ەكيپاجدارىنىڭ ناتيجەسى 16- تامىزدا شىعارىلادى.