فۋتبول: قازاقستان چەمپيوناتىنىڭ ءبىرىنشى كەزەڭى اياقتالدى
ءبىرىنشى كەزەڭنىڭ قورىتىندىسى بويىنشا، «اقتوبە» (اقتوبە)، «قايرات» (الماتى) جانە «استانا» (استانا) كوماندالارى تۋرنير كەستەسىنىڭ الدىڭعى ءۇش ورنىنا جايعاستى. «شاحتەر» (قاراعاندى)، «ورداباسى» (شىمكەنت) جانە «قايسار» ( قىزىلوردا) العاشقى التىلىققا ەندى.
بۇگىن «اقتوبە» ءوز الاڭىندا «تارازدى» قابىلدادى. الاڭ يەلەرى روبەرت ارزۋمانيان مەن مارات ءحايرۋلليننىڭ 32 جانە 43-مينۋتتاردا سالعان گولدارىمەن جەڭىسكە جەتتى، ەسەپ: 2:0.
ال قاراعاندىداعى ويىندا الاڭ يەلەرى مەن پاۆلوداردىڭ «ەرتىسى» 2:2 بولىپ ويىندى اياقتادى. «ەرتىس» ۇزدىك التىلىققا ەنە المادى.
سەمەيدىڭ «سپارتاگى» قوستانايدىڭ «توبىلىن» 2:1 ەسەبىمەن ۇتقانى كۇتپەگەن جاڭالىق بولدى.
اتىراۋدا «قايرات» تاعى دا شەبەرلىگىن تانىتتى، 23-مينۋتتا جەرار گوۋ ەسەپ اشىپ، كومانداسىن العا سۇيرەدى. ەكىنشى گولدى الاڭ يەلەرى ساپىنداعى رەنات ابدۋللين ءوز قاقپاسىنا سالىپ الدى. 90-مينۋتتا اسلان دارابايەۆ سوڭعى نۇكتەنى قويدى.
تالدىقورعاندا جەرگىلىكتى «جەتىسۋ» مەن «استانا» اراسىنداعى ماتچتا ەسەپ اشىلمادى. مەيماندار شۆەدتىڭ ايك كومانداسىمەن وتكەلى تۇرعان قارىمتا كەزدەسۋگە كوبىرەك الاڭداعان سياقتى.
شىمكەنتتە «ورداباسى» قىزىلوردانىڭ «قايسارىن» 2:1 ەسەبىمەن جەڭدى. الاڭ يەلەرى ءبىرىنشى تايمنىڭ ۇشتەن ەكى بولىگىندە ەسەپتى 2:0 گە جەتكىزدى. گول اۆتورلارى - ەركەبۇلان تۇڭعىشبايەۆ (11-مينۋت) پەن داۋرەنبەك تاجىمبەتوۆ (33-مينۋت). قوناقتار ساپىنان جالعىز قارىمتا دوپتى 88-مينۋتتا ەلجاس التىنبەكوۆ قايتاردى. «ورداباسى» - «كايسار» 2:1 (2:0).
