عالامتوردىڭ كەرى اسەرىنەن ساقتانىڭىز

استانا. قازاقپارات - الداعى ۋاقىتتا ادامزاتتىڭ قاس جاۋى سىرتتان ەمەس، قايتا ءوزى ويلاپ تاپقان جاڭالىقتارى مەن وزدەرى زەرتتەپ وتىرعان تەحنيكادان كەلۋى مۇمكىن.

بۇل ارينە، تەحنيكاعا قارسىمىن دەگەندىك ەمەس.

تەك ءبارى دە سانا- سەزىمنىڭ جويىلۋىنا بايلانىستى.

اتوم، ۋلى گاز، جارىلعىش زاتتار، ءتىپتى، كومپيۋتەردىڭ ءوزى...

وسىنىڭ ءبارى دە ادام بالاسىنىڭ ساناسىن تەجەۋدە. بۇكىل جەر شارىنىڭ تاعدىرىن ءبىر-اق ساتتە شەشىپ كەتەتىن يادرولىق قارۋلار قازىر جەر بەتىندە جوق ەمەس.

جارايدى. بۇل عالىمداردىڭ باس قاتىرار شارۋاسى عوي. ءبىز تەك قاراپايىم كومپيۋتەر قولدانۋشىلارىن الايىقشى.

ءسىز الماتىدا كۇن سايىن كوبەيىپ كەلە جاتقان عالامتور ورتالىقتارىنا، ويىن كلۋبتارىنا بارىپ كوردىڭىز بە؟! كىلەڭ ازامات جاسىنا تولماعان، تاڭدايىنان ءسۇتتىڭ ءدامى كەتپەگەن سابيلەر اۋزىنان ادام ايتقىسىز بوقتىق ءسوزدى مىڭ قۇبىلتىپ سىلتەپ، قايداعى اتىس-شابىس ويىن تۇرلەرىنىڭ ءتۇبىن ءتۇسىرىپ وتىرادى.

بىزدەگى ەڭ باستى قاتەلىك بالا تاربيەسىنەن باستالىپ ەدى. عالامتور مەن كومپيۋتەردىڭ تاربيەسى ءسىزدىڭ ايتقان اقىلىڭىزدان الدەنەشە ەسە جوعارى بولىپ تۇر. سابيلەر ءقازىر سول دۇنيەدەن ۇيرەنە باستادى. عالامتور بولاشاق قازاق بالاسىن تابيەلەۋ ۇستىندە.

ايتپاعىمىز عالامتوردى مۇلدە قولدانبا، ودان اۋلاق بول دەگەندىك ەمەس. بىزگە قازىر ەڭ ماڭىزدى - تاربيە، بولاشاق ۇرپاققا، بۇگىنگى سابيلەرگە عالامتوردى قالاي قولدانۋ، قانشالىقتى قولدانۋ كەرەكتىگى تۋرالى ءبىلىم بەرۋ.

كوپتەگەن ەلدەردە ازامات جاسىنا تولماعانداردىڭ عالامتوردى قولدانۋى، عالامتور كۋلبتارىنا بارۋى تۋرالى زاڭدار جۇزەگە اسىپ ۇلگەردى. ولاردا قازىر ءاربىر ادام، سونىڭ ىشىندە عالامتور كلۋبىن اشىپ وتىرعاندار دا بالا تاربيەسىنە كوڭىل بولەدى. قىتايدا عالامتور كلۋبتارىندا ازامات جاسىنا تولماعانداردىڭ كىرۋىن شەكتەۋ تىم قاتاڭ تۇردە جۇزەگە اسادى. ال جاپوندار بۇعان جيىرما جىل بۇرىن- اق قاتتى كوڭىل بولە باستاعان. سوندىقتان دا ولاردا ۇرپاق تاربيەسى تىم جۇيەلى تۇردە جۇرگىزىلەدى.

ال ءبىز شە؟ بالالارىمىزدىڭ عالامتور كلۋبتارىندا ءتۇنى بويى «قىرىلىسىپ» وتىراتىنىنان حاباردارمىز با؟!

كومپيۋتەر مەن عالامتورعا بايلانىستى نەبىر سۇمدىق حابارلاردى بايقايسىڭ. ستراتەگيالىق كومپيۋتەر ويىندارى قازىر اۋرۋعا اينالىپ ۇلگەردى. جاقىندا عانا ءبىر حاباردان ەكى جاس جۇباي (قاي ەل ەكەنىن ۇمىتىپ تۇرمىن) ستراتەگيالىق عالامتور ويىنىنا قۇنىعىپ، ەكى ايدان اسقان سابيلەرىن اشتان ءولتىرىپ العاندىعى، ال كۇيەۋىنىڭ ماڭگىلىك سال اۋرۋىنا شالدىققانى جايلى ەستىپ ەدىم. ازيا ەلدەرىندە مۇنداي وقيعالار كۇن سايىن ورىن الۋدا.

تايلاندتىق ازامات 24 ساعات بويى توقتاۋسىز كومپيۋتەر ويىنىن ويناعاندىقتان ۇستەلگە باسىن سۇيەگەن كۇيى ماڭگىلىك ۇيقىعا كەتكەن. ال قىتايلىق ەكى ازامات ەكى تاۋلىك بويىنا ويىن ويناعاندىقتان، ءبىرى جۇيكە جۇيەنىڭ سالدانۋىنا دۋشار بولعان دا، ەكىنشىسى ورنىنان تۇرىپ از كەم ۋاقىتتان سوڭ، وقيعا ورنىندا ءتىل تارتپاي كەتكەن. ۇيقىسىزدىقتان، جۇيكە-جۇيەگە قىسىم تۇسۋدەن قازا بولعان وسىنداي تيپتەگى حابارلار كۇن ساناپ كوبەيىپ كەلەدى.

"بالاپان ۇيادا نەنى كورسە، ۇشقاندا سونى الادى" دەگەن اتالى ءسوز بار قازاقتا. ولاردىڭ سويلەۋ مانەرىندەگى تاربيەسىزدىكتىڭ نەگىزى اتا-اناسىندا جاتىر. نەنىڭ جامان، نەنىڭ جاقسى ەكەندىگى تۋرالى سەزىندىرۋ، ەسكەرتىپ وتىرۋ قاجەت.

ال كومپيۋتەر مەن عالامتور - ءدال قازىرگى كەزەڭدەگى بالا تاربيەسى ءۇشىن اسا ماڭىزدى ماسەلەنىڭ ءبىرى. كەلەشەك قازاق ەلىنىڭ تىزگىنىن ۇستار ازماتتاردىڭ ساۋ دەنەلى، ساپالى، تاربيەلى بولۋى ءسىزدىڭ قولىڭىزدا ەكەنىن ەستەن شىعارماڭىز.

مالىمەتتەر ماسساگەت سايتىنان الىندى