ن. نازاربايەۆ: «سامۇرىق-قازىنا» ءوزىنىڭ نەگىزگى قىزمەتىمەن اينالىسۋعا دەن قويۋى قاجەت
كەزدەسۋ بارىسىندا ءو. شوكەيەۆ مەملەكەت باسشىسىنا «سامۇرىق-قازىنا» اق كومپانيالار توبىنداعى ترانسفورماتسيا باعدارلاماسىنا ازىرلىك بارىسى تۋرالى باياندادى.
نۇرسۇلتان نازاربايەۆ «سامۇرىق-قازىنانىڭ» وتاندىق ەكونوميكا اكسيالارىنىڭ ءىرى يەلەنۋشىسى بولىپ سانالاتىنىن اتاپ ءوتتى.
«بارلىق مەملەكەتتىك وندىرىستىك كومپانيالار قوردىڭ قاراماعىندا، ال ونىڭ مىندەتى - سولاردىڭ كورپوراتيۆتىك باسقارىلۋىن جاقسارتۋ جانە اكتيۆتەردىڭ قۇنىن ارتتىرۋ.
وتكەن جاھاندىق داعدارىس كەزەڭىندە بانكتەردى قولداۋ جونىندە ەلەۋلى جۇمىس اتقارىلدى جانە قورعا ولاردىڭ اكتسيونەرلەرىنىڭ قۇرامىنا كىرۋگە تۋرا كەلدى. بۇگىندە «سامۇرىق-قازىنا» بانك كاپيتالىنان شىقتى، ەندى ول وندىرىستىك كومپانيالارعا ينۆەستيتسيا تارتۋ، جاڭا ءونىم تۇرلەرىن يگەرۋ، جاڭا تەحنولوگيالار ەنگىزۋدى قامتيتىن ءوزىنىڭ نەگىزگى قىزمەتىمەن اينالىسۋعا دەن قويۋى قاجەت»، - دەدى مەملەكەت باسشىسى.
ءوز كەزەگىندە ءو. شوكەيەۆ قوردى ترانسفورماتسيالاۋ باعدارلاماسىنىڭ باسىمدىعى بار ءتورت باعىتى ايقىندالعانىن اتاپ ءوتتى. ولار: كورپوراتيۆتىك باسقارۋ؛ ستاندارتتاۋ جانە بيزنەس-ۇدەرىستەردى وڭتايلاندىرۋ؛ باسقارۋ مەن بيزنەس-شەشىمدەردىڭ ءبىرىڭعاي اقپاراتتىق جۇيەسىن جاساۋ؛ بارلىق كومپانيالار توبىندا جۇمىستى ۇزدىكسىز جەتىلدىرۋ مادەنيەتىن قالىپتاستىرۋ.
قازىرگى ۋاقىتتا اتالعان باعدارلامانى ازىرلەۋ جۇمىسى اياقتالۋعا تاياۋ. سونىمەن قاتار، «سامۇرىق-قازىنا» كومپانيالار توبىن ترانسفورماتسيالاۋ باعدارلاماسىن رەسمي تۇردە باستاپ بەرەتىن حالىقارالىق فورۋم وتكىزۋ جوسپارلانۋدا.
كەزدەسۋ قورىتىندىسى بويىنشا مەملەكەت باسشىسى ءبىرقاتار ناقتى تاپسىرمالار بەردى.
