مىسىر باتىس افريكاداعى ەبولا بەزگەگىنە بايلانىستى كارانتيندىك باقىلاۋدى كۇشەيتتى

استانا. قازاقپارات - كاير حالىقارالىق اۋەجايىندا باتىس افريكاداعى ەبولا بەزگەگى ىندەتىنە بايلانىستى كارانتيندىك باقىلاۋ ەداۋىر كۇشەيتىلدى.

ەلدىڭ باستى اۋەجايىنىڭ وكىلدەرى سەنبى كۇنى حابارلاعانداي، مۇنداي شارالار قاتەرلى اۋرۋدىڭ مىسىر اۋماعىنا ەنىپ كەتۋىنە جول بەرمەۋ ماقساتىندا جاسالىپ وتىر، دەپ حابارلايدى يتار-تاسس.

اۋەجايدىڭ كارانتيندىك قىزمەتىنىڭ ديرەكتورى يماد ءال-ءحاشيميدىڭ ايتۋىنشا، ساحارانىڭ وڭتۇستىگىندەگى ەلدەردەن كەلىپ جاتقان بارلىق جولاۋشىلار تولىق تەكسەرۋدەن وتكىزىلۋدە. ونىڭ مالىمەتىنشە، اۋرۋدىڭ العاشقى بەلگىلەرى تۇماۋمەن ۇقساس بولادى، سونداي-اق، ادام ادەتتەن تىس شارشاپ، دەنە قىزۋى كوتەرىلىپ، قان قىسىمى تومەندەيدى.

مىسىردىڭ دەنساۋلىق ساقتاۋ مينيسترلىگى ەلدە ەبولا بەزگەگىنىڭ جوقتىعى تۋرالى رەسمي تۇردە مالىمدەدى. الايدا، مامانداردىڭ پىكىرىنشە، مىسىرعا گۆينەيا، سەررا-لەونە، نيگەريا جانە ليبەريا سياقتى ەلدەردەن كەلەتىن يمميگرانتتاردىڭ كوبەيۋىنە بايلانىستى مىسىرلىقتار اتالعان اۋرۋلارعا ۇشىراماۋىنا كەپىلدىك جوق. «ءبىز بارلىق قاۋىپسىزدىك شارالارىن جاساپ، اۋرۋدىڭ ەل اۋماعىنا وتپەۋىن قامتاماسىز ەتۋگە ءتيىسپىز»، - دەيدى مىسىرداعى دۇنيەجۇزىلىك دەنساۋلىق ساقتاۋ ۇيىمىنىڭ وكىلى باحا ءال-كۋسي.

ايتا كەتەيىك، ۆيرۋس بۇگىنگە دەيىن 729 ادامنىڭ ءومىرىن قيدى. بارلىعى 1300 ادام وسى ىندەتكە ۇشىراعانى تىركەلگەن. ناۋقاستاردىڭ 90 پايىزى اجال قۇشۋى مۇمكىن، ازىرگە بۇل كورسەتكىش 55 پايىزعا جەتتى. اۋرۋدىڭ وشاعى بارلىق ناۋقاستاردىڭ 70 پايىزىن قۇراعان سەررا-لەونەنىڭ شىعىسى، گۆينەيانىڭ وڭتۇستىگى جانە ليبەريانىڭ سولتۇستىك ايماقتارى بولىپ وتىر.