بادىك حانىم

استانا. قازاقپارات - - قويىڭىزشى!؟ ءسىز مەنىڭ كورشىمسىز بە، دارىگەر؟ - ءيا، ءسىزدىڭ ەكى كورشىڭىزدىڭ ءبىرىمىن، حانىم.

- قۋانىشىمدا شەك جوق، دارىگەر؛ تالايدان بەرى سىزبەن الاڭسىز اڭگىمەلەسۋدىڭ رەتى تۇسپەي ءجۇر ەدى.

- مەن دە قۋانىشتىمىن.

- سىزدەن تالاي كەڭەس الۋىم كەرەك، دارىگەر... بۇل سىزگە قيىندىق تۋدىرماي ما؟

- شىنىمدى ايتسام، حانىم...

- ەڭ الدىمەن ۇيقىسىزدىعىم... ۇيىقتاي الماي قينالاتىنىم ەسىڭىزدە مە؟ مۇنىڭىز نە، دارىگەر؟ كوجە ىشپەكسىز بە؟

- نەگە ىشپەسكە؟

- ەسىڭىز دۇرىس پا! تاماقتانار الدىندا سۇيىقتىق ىشۋدەن اسقان زياندى نارسە جوق ەمەس پە!

- عافۋ ەتىڭىز، حانىم...

- بۇل قويۋ سورپانى ارى قويا سالىڭىز، دارىگەر، وتىنەمىن سىزدەن. اس ءمازىرىن بىرگە قارايىق... اقسەركە بولادى... بالىقتا اقۋىز كوپ. جەمدەلگەن تاۋىق تا... بىزگە قاجەتتى «ا» دارۋمەنىن مايدان الامىز؛ س دارۋمەنىن جەمىستەردەن... ال ۆ دارۋمەنى مۇلدەم جوق ەكەن... اتتەگەنە اي! وتە وكىنىشتى، سولاي ەمەس پە، دارىگەر؟

- جوققا جۇيرىك جەتپەيدى.

- ايتىڭىزشى، دارىگەر، مەن سياقتى ۇنەمى قيمىلداپ جۇرەتىن ايەلگە كۇنىنە قانشا كالوريا قاجەت؟

- ناقتىسىن ايتا المايمىن، حانىم. ونىڭ ەشقانداي ماڭىزى دا جوق.

- ماڭىزى جوق دەگەنىڭىز نە؟ ولاي بولسا، وتاربا ءۇشىن كومىردىڭ، ال اۆتوموبيل ءۇشىن جانارمايدىڭ ەش ماڭىزى جوق دەيتىن شىعارسىز! مەنىڭ ءومىر سالتىم ەرلەردىكىمەن بىردەي، دەمەك، ماعان ءۇش مىڭ كالوريا كەرەك، ايتپەسە ازىپ كەتەمىن.

- ءسىز ساناپ جۇرەسىز بە، حانىم؟

- سانايسىز با دەيمىسىز! ءسىز ازىلدەپ وتىرعان بولارسىز، دارىگەر؟ مەن ۇنەمى كەستەمدى الىپ جۇرەمىن. (قولسومكەسىن اشادى). مىنەكەي، قاراڭىز، دارىگەر... شوشقا ەتى -  ءبىر كەلىسىندە ءبىر مىڭ جەتى ءجۇز ەلۋ كالوريا... بالاپان ەتىندە - مىڭ بەس ءجۇز... ءسۇت - جەتى ءجۇز...

- تاماشا. مىنا بالاپان قاناتىنىڭ سالماعى قانشا بولاتىنىن قالاي بىلۋگە بولادى؟

- ۇيدە مەن بارلىق تاعام ۇلەستەرىن تارازىعا تارتۋدى تالاپ ەتەمىن. ال مۇندا، قوناققا بارعاندا، كوزبەن مولشەرلەيمىن. (داۋسى جامان شىعىپ كەتتى). ويباي، دارىگەر!

- سىزگە نە بولدى، حانىم؟

- جالىنايىن، توقتاڭىز! بۇعان ءتوزۋ مۇمكىن ەمەس، بۇل پىشاق ءجۇزىنىڭ شىقىرىنداي، قۇلاققا تۇرپىدەي تيەتىن جالعان نوتاداي، بۇل، بۇل...

- مەن نە ءبۇلدىرىپ قويدىم، حانىم؟

- دارىگەر، ءسىز اقۋىزدى كومىرسۋلارمەن ارالاستىرىپ وتىرسىز... اح، دارىگەر، توقتاي گورىڭىز!

- اي، اتاڭا... ماداق-اي، بەرگەندەرىن جەپ جاتىرمىن عوي.

- ءسىز! اتاقتى دارىگەر!.. ءبىراق ءسىز قاتارداعى فرانسۋزدىڭ ادەتتەگى تاعامى كارتوپ قوسىلعان قۋىرىلعان ەت ناعىز قاۋىپتى ۋ ەكەنىن بىلەسىز عوي.

- سوعان قاراماستان، قاتارداعى فرانسۋزدار امان- ەسەن ءتىرى ءجۇر...

- دارىگەر، ءسىز بارىپ تۇرعان ءدىنبۇزار ەكەنسىز! ەندىگارى سىزبەن سويلەسپەيمىن...

 (باسەڭ داۋىسپەن): ەكىنشى كورشىم كىم ەكەن؟ تەگىن ەستىپ ەدىم، ءبىراق تانىس ەمەس.

- ول قارجى مينيسترلىگىنىڭ ماڭىزدى شەنەۋنىگى، حانىم.

- راس پا؟ قانداي كەرەمەت! (سولعا قاراي سەرگەك بۇرىلادى). ءبىزدىڭ بيۋدجەتىمىز نە بولىپ جاتىر، مىرزا؟

ەسەبىن شىعاردىڭىز با؟

- اح، حانىمىم، اياساڭىزشى... بۇگىن تابانى كۇرەكتەي سەگىز ساعات بويى بيۋدجەت جايلى سويلەدىم... تىم بولماسا ءۇزىلىس كەزىندە دامىلدايمىن با دەپ ەدىم...

- دامىلداۋ ما!.. ءبىزدىڭ شارۋالارىمىزدى رەتتەپ بەرگەن سوڭ دامىلدايسىز. بۇل وپ-وڭاي ەمەس پە.

- وپ-وڭاي دەيمىسىز، حانىم؟

- وتە وڭاي. ءبىزدىڭ بيۋدجەتىمىز ءتورت تريلليون با؟

- ءيا، شامامەن سولاي.

- تاماشا. بارلىق شىعىنداردى جيىرما پايىزعا قىسقارتىڭىز.

 (دارىگەر مەن قارجىگەر ءبارىن بىلەتىن حانىمنىڭ كوزىن الا بەرە ءبىر-بىرىنە سىبايلاستار سەكىلدى تورىعا قارايدى).

ءسىزدىڭ، مەنىڭ قىمباتتىم، ەشتەڭە بىلمەۋگە پاراساتىڭىز جەتەدى. ءبارىن ءبىلىپ قوياتىنىڭىز سوندىقتان.

 قوش بولىڭىز.

 اندرە مورۋا

اۋدارعان قۇرالاي رايسوۆا

blogtime.kz