ءوز-وزىىنە قول سالۋ سانى بويىنشا ءبىرىنشى ورىندى قىتاي الادى

استانا. قازاقپارات - ادامنىڭ جالپى قان ءاناليزىنىڭ ناتيجەلەرى ارقىلى ونىڭ وزىنە-ءوزى قول جۇمساۋعا قانشالىقتى بەيىم ەكەنىن انىقتاۋعا بولادى. مۇنداي قورىتىندىنى امەريكانىڭ بالتيمور قالاسىنداعى دجونس گوپكينس اتىنداعى مەديتسينالىق زەرتتەۋلەر ينستيتۋتىنىڭ ماماندارى جاساعان.

زەرتتەۋ ناتيجەلەرى «ۆاشينگتون پوست» گازەتىندە جاريالاندى.

«ءبىز ادامنىڭ SKA2 گەنى ميدىڭ سترەسسكە جاۋاپ قاتۋىن انىقتايدى دەگەن تۇجىرىم جاسادىق. وزىنە-ءوزى قول جۇمساپ قازا تاپقاندار مەن سۋيتسيد جاساۋعا ارەكەت ەتكەندەردىڭ ميلارىن زەرتتەي وتىرىپ، ولاردا SKA2 گەنىنىڭ بەلسەندىلىگى تومەن ەكەنىن ءارى مۋتاتسياعا ۇشىراعانىن انىقتادىق. ونىڭ مۋتاتسياعا ۇشىراۋ دەڭگەيى نەعۇرلىم جوعارى بولسا، ادامنىڭ ءوز ومىرىنە ءوزىنىڭ قول سۇعۋى دا سوعۇرلىم جوعارى بولادى»، - دەيدى زەرتتەۋ جەتەكشىسى زاحاري كامينسكي.

زەرتتەۋگە 325 امەريكاندىق قاتىسقان. ونىڭ ناتيجەسى بويىنشا وزىنە-ءوزى قول جۇمساۋعا ارەكەت ەتكەندەر مەن بۇل تۋرالى ويلانعاندار 80 پايىزعا دەيىن ءدال انىقتالعان. ءتىپتى، جاستاردىڭ اراسىندا بۇل كورسەتكىش %100 عا دەيىن جەتكەن.

د د س ۇ مالىمەتىنشە، جىل سايىن الەمدە 1,5 ميلليونعا جۋىق ادام وزىنە-ءوزى قول جۇمساپ، ومىرىمەن قوش ايتسادى. ال 20 ميلليونعا جۋىق ادام وسىنداي ارەكەتكە تالپىنادى ەكەن.

سۋيتسيدتەر سانى بويىنشا ءبىرىنشى ورىندى قىتاي الادى، مۇندا جىل سايىن 300 مىڭ ادام ءوز ەركىمەن ومىرمەن قوشتاسادى. ەكىنشى ورىندا - ءۇندىستان (160 مىڭ ادام)، ءۇشىنشى ورىندا - ا ق ش (37 مىڭ ادام) تۇر، دەپ حابارلايدى يتار-تاسس.