دەپۋتاتتار مەن مينيسترلەردىڭ جالاقىسى ەكى ەسەگە قىسقاردى

استانا. قازاقپارات - قازىنا قارجىسىن ۇنەمدەۋ ماقساتىندا ۋكراينانىڭ دەپۋتاتتارى مەن مينيسترلەرىنىڭ جالاقىسى ەكى ەسەگە دەيىن قىسقاردى.

بۇل تۋرالى ۇكىمەت جەتەكشىسى ارسەني ياتسەنيۋك مالىمدەدى.

بيۋدجەت تۋرالى زاڭ جوباسىنا ەنگەن جاڭا وزگەرىستەرگە سايكەس، ۇكىمەت مۇشەلەرىنىڭ، پرەمەر-ءمينيستردىڭ، پرەمەر-ءمينيستردىڭ ورىنباسارىنىڭ جانە 450 گە جۋىق دەپۋتاتتىڭ جالاقىسى 10 مىڭ گريۆەن كولەمىندە قىسقارماق.

پرەمەر-ءمينيستردىڭ ايتۋىنشا، مۇنداي قىسقارتۋ 400 ميلليون گريۆەنگە جۋىق بيۋدجەت قاراجاتىن ۇنەمدەۋگە مۇمكىندىك بەرەدى.

ارسەني ياتسەنيۋك، ۋكراينا پرەمەر-ءمينيسترى:

- ءبىز، حالىق قالاۋلىلارىنىڭ، ۇكىمەت مۇشەلەرىنىڭ جانە جوعارى لاۋازىمدى قىزمەتكەرلەردىڭ ەڭبەكاقىسىن قىسقارتۋ تۋرالى شەشىم قابىلدادىق. بيۋدجەت قاراجاتىن ۇنەمدەۋ ماقساتىندا از جالاقىنى عانا قالدىرىپ وتىرمىز. جاڭا ايلىق 17 مىڭ گريۆەن ەمەس، 6,5 مىڭدى عانا قۇرايتىن بولادى.

24.kz