شىمكەنتتە جۇكتى قىزدار جينالىپ جاتىر

استانا. قازاقپارات - شىمكەنتتە جالعىزباستى انالارعا ارنالعان ءۇي اشىلدى.

ول ورتالىق ومىرگە نارەستە اكەلگەن سوڭ جاقىندارىنان قولداۋ تابا الماعان، باسپاناسى جوق، ال ەڭ قورقىنىشتىسى، بالادان باس تارتۋدى ويلاستىرىپ جۇرگەن جاس انالارعا ارنالعان دەپ حابارلايدى جەرگىلىكتى وتىرار ارنا.

اشىلعانىنا نەبارى 4 اي وتسە دە تالاي بويجەتكەندى پانالاتقان ورتالىق ماماندارىنىڭ ماقساتى - جاس انالاردىڭ سابيىنەن باس تارتۋىنا جول بەرمەۋ. ءتىرى جەتىمدەر سانىن ازايتۋ.

وڭ بوساعادا وتىرىپ، جۇكتى بولىپ، جالعىز قالعان جۇلدىزدىڭ بۇل ۇيگە كەلگەنىنە ءبىر ايدان ەندى استى. ون التىعا تولماي جاتىپ انا اتانعان بويجەتكەن ءسابيىنىڭ اكەسىن ەسكە العىسى جوق. ايتۋىنشا، سۇيگەن جىگىتى دە، تۋعان اتا-اناسى دا جۇكتى ەكەنىن بىلگەندە باس تارتىپتى. الايدا جاس قىز باۋىر ەتى بالاسىنان بەزىنگەن جوق. كەرىسىنشە، قيىندىقتاردىڭ بارلىعىن جەڭىپ، بالاسىن اياققا تۇرعىزۋدى ارماندايدى.

جۇلدىز: "مەكتەپتە وقىپ جۇرگەنىمدە جىگىتتىممەن تانىستىم. "ءسۇيدىم- كۇيدىم" دەگەن سوزدەرىنە سەنىپ، الدانىپ قالدىم. وكىنىشكە وراي، جۇكتى ەكەنىمدى بىلگەندە ءوز ءىسىن موينىمەن كوتەرۋدىڭ ورنىنا مەنى تاياقتىڭ استىنا جىقتى. اتا-انام ونى سوتقا دا بەردى. ونىڭ اكە-شەشەسى "ۇيلەندىرەيىك، ءىستى جابا سالايىق" دەدى.

الايدا مەن كەلىسىمىمدى بەرمەدىم. سودان نەكەسىز بالا تۋعانىما قارسى بولعان اكەم مەنەن باس تارتتى. ال انام نەمەرەسىن كورىپ تۇرادى. الايدا ۇيگە قايتىپ بارا المايمىن. اكەم رۇقسات بەرمەي جاتىر. سوندىقتان وسى جەردى پانالاۋعا ءماجبۇرمىن"، - دەپ وقيعاسىن باياندادى.

نەكەسىز بالا تۋعانىما قارسى بولعان اكەم مەنەن باس تارتتى. ال انام نەمەرەسىن كورىپ تۇرادى. الايدا ۇيگە قايتىپ بارا المايمىن. اكەم رۇقسات بەرمەي جاتىر. سوندىقتان وسى جەردى پانالاۋعا ءماجبۇرمىن

قازىر جۇلدىز قىزى جىبەكپەن بىرگە كاسىپكەرلەر اشىپ بەرگەن انالار ۇيىندە تۇرىپ جاتىر. "انا ءۇيى" قوعامدىق قورى بالا مەن انانى قاجەتتى كەرەك-جاراقپەن قامتىپ، بالاعا قاراپ، انانى وقىتىپ، جۇمىسقا ورنالاستىرۋدى باستى مىندەتتەرىنە الىپ وتىر.

مۇنداعى ماماندار وسىنداي ارنايى ۇيلەر انا مەن بالا اراسىنداعى ماحابباتتى نىعايتىپ، تاستاندى بالالاردىڭ سانىن ازايتۋ ءۇشىن اشىلىپ جاتىر دەيدى.

ايتا كەتەيىك، 4 ايدان بەرى بۇل ۇيدە 11 گە جۋىق بويجەتكەن تۇرعان. ولاردىڭ التاۋى اتا-اناسىمەن تاتۋلاسىپ، بالاسىن بالالار ۇيىنە وتكىزۋدەن باس تارتقان. ءبىر بويجەتكەن بالاسىنان بەزىنگەنى ءۇشىن ورتالىقتان شىعارىلعان. قالعان قىزدار ومىردەگى ءوز ورنىن تاپقانشا وسى جەردى پانالاماق.

مامانداردىڭ ايتۋىنشا، انالار بوبەگىنەن بەزىنبەس ءۇشىن شىمكەنتتە تاعى دا ءبىر ورتالىق اشۋ جوسپاردا بار. "انا ءۇيى" قوعامدىق قورى وسىلايشا قازاقستانداعى تاستاندى بالالاردىڭ سانىن ازايتۋدى جوسپارلاپ وتىر - Otyrar-tv.kz.

دۋاناباي جولداسبەك