ورتالىق سايلاۋ كوميسسياسى سەنات دەپۋتاتتىعىنا كانديداتتارعا قويىلاتىن تالاپتاردى اتادى

استانا. قازاقپارات - الداعى سايلاۋدا سەنات دەپۋتاتتىعىنا كانديداتتارعا قويىلاتىن تالاپتار دا جوعارى بولادى.

 بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆ ءمالىم ەتتى.

«سەناتور بولۋعا ۇمىتكەر جاسى 30 دان اسقان، جوعارى ءبىلىمى بار، جۇمىس ستاجى بەس جىلدان كەم بولمايتىن، سونداي- اق سوڭعى 10 جىل بويى ەلىمىزدىڭ اۋماعىندا، ال سوڭعى 13 جىل بويى ءوزى داۋىسقا تۇسەتىن وڭىردە تۇراقتى تۇراتىن قازاقستان رەسپۋبليكاسىنىڭ ازاماتى بولۋى قاجەت. بۇل ورايدا ءبىرقاتار ماڭىزدى ماسەلەلەر بار. بىرىنشىدەن، سەنات دەپۋتاتتىعىنا كانديدات ءتيىستى وبلىستاعى ءماسليحات دەپۋتاتتارىنىڭ 10 پايىزىنىڭ قولداۋىنا يە بولۋى ءتيىس. ەكىنشىدەن، ۇسىنىلعان كانديداتتاردىڭ ءارقايسىسى ورتالىق سايلاۋ كوميسسياسىنىڭ ارنايى شوتىنا دەپوزيت رەتىندە 300 مىڭ تەڭگەدەن كەم بولمايتىن سايلاۋ جارناسىن ەنگىزۋى كەرەك» ، - دەدى قۋاندىق تۇرعانقۇلوۆ.

ونىڭ ايتۋىنشا، ۇمىتكەر مەن ونىڭ جۇبايى سالىق ورگاندارىنا ءوز تابىسى جانە مۇلكى جايلى دەكلاراتسيا تاپسىرۋى ءتيىس.

«وبلىستىق جانە استانا مەن الماتى قالالىق سايلاۋ كوميسسيالارى داۋىس بەرۋ، داۋىستاردى ساناۋ جانە ونىڭ ناتيجەلەرىن جاريالاۋدى ءبىر كۇن ىشىندە 1 - قازاندا جۇرگىزەدى. سايلاۋ ناتيجەلەرىن ورتالىق سايلاۋ كوميسسياسى 2014 - جىلعى 7 - قازاننان كەشىكتىرمەي بەلگىلەۋى ءتيىس» ، - دەدى و س ك باسشىسى.

ەسكە سالا كەتەيىك، مەملەكەت باسشىسى «قازاقستان رەسپۋبليكاسى پارلامەنتى سەناتىنىڭ دەپۋتاتتارىن سايلاۋدى 2014 - جىلعى 1 - قازانعا تاعايىنداۋ تۋرالى» جارلىققا قول قويعان بولاتىن.

 

اۆتور: قانات مامەتقازى ۇلى