ايسۇلۋ ارتايەۆتى تاعى سوتقا سۇيرەمەك

استانا. قازاقپارات - بوكستان وليمپيادا چەمپيونى باقتيار ارتايەۆتىڭ قاتىسۋىمەن بولعان وقيعا جونىندەگى قىلمىستىق ءىس توقتاتىلدى.

داۋلى ىسكە قاتىستى قورعاۋشى «قىلمىستىق ءىس قىلمىس قۇرامىنىڭ جوقتىعىنا بايلانىستى توقتاتىلدى»، - دەپ جاۋاپ بەردى. ال Instagram الەۋمەتتىك جەلىسىندە باقتياردىڭ دوسى، «جىگىتتەر» توبىنىڭ ءانشىسى باعلان ءابدىرايىموۆ بوكسشىمەن بىرگە وتىرعان سۋرەتىن سالىپ، ءىستىڭ وڭ شەشىممەن اياقتالعانىن جازادى. «ال، باكە دوسىم اق جول!!! ەلدى شۋلاتقان جالا ادىلدىكپەن شەشىلگەنىنە قۋانىشتىمىن! ەندى جولىڭىزدا ەش بوگەت بولماسىن. لوندونداعى وقۋدى ويداعىداي وقىپ كەلىپ، قازاق ەلىنە قىزمەتىڭىزدى قايتا جالعاستىرۋدى جاراتقان ءناسىپ ەتسىن!!! كورىسكەنشە كۇن جاقسى. ۇزاق ساپار ءساتتى بولعاي! ءبىر جارىم جىلىڭىز - ءبىر جارىم كۇندەي بوپ وتە شىقسىن. شىعارىپ سالىپ تۇرعان ءسات. 31.07.14» دەپ جازبا قالدىردى ءانشى.

بۇل وقيعاعا قاتىستى قىلمىستىق ءىستىڭ اياقتالعانىن زارداپ شەككەن ايسۇلۋ ىبراشيەۆانىڭ ءوزى دە ايتتى. «قىلمىستىق ءىس ناقتى دالەلدەنبەگەننەن كەيىن استانا قالاسىنىڭ ءى ءى د بۇل ءىستى جاۋىپ تاستادى. ءى ءى د وكىلدەرىنىڭ ايتۋىنا قاراعاندا، مەن ەندى ونى ازاماتتىق سوتقا بەرۋىمە بولادى ەكەن. ءبىراق، بوكسشىنىڭ كەسىرىنەن ميىم شايقالىپ كەتتى. ودان بولەك باقتيار جۇرتتىڭ كوزىنشە مەنى ماسقارالادى. مەنىڭ ويىمشا بۇل ازاماتتىق سوتتا قارالاتىن ءىس ەمەس»، -  دەيدى ول.

سونىمەن قاتار ايسۇلۋ الداعى ۋاقىتتا پرەزيدەنت اكىمشىلىگىنە، «نۇر وتان» پارتياسىنا جانە باس پروكۋراتۋراعا شاعىم بىلدىرەتىنىن ايتتى.

ەسكە سالا كەتەيىك، باقتيار ارتايەۆ استانا پوليتسياسى قوزعاعان قىلمىستىق ءىستىڭ فيگۋرانتى اتانعان بولاتىن. استانا قالالىق ىشكى ىستەر دەپارتامەنتىنە قالا تۇرعىنى ايسۇلۋ ىبراشيەۆا شاعىم ءتۇسىرىپ، 29- ماۋسىمعا قاراعان ءتۇنى ارتايەۆتىڭ بەتىنەن ۇرعانىن ايتقان. ءبىراق وقيعا بولعان كوڭىل كوتەرۋ ورنىنىڭ كۇزەتشىلەرى قىزدىڭ ايتقاندارىن جوققا شىعاردى. ولار ارتايەۆتىڭ قىزدى ۇرعانىن كورمەگەن.

كەيىننەن ارتايەۆتىڭ ءوزى قارسى مالىمدەمە جاساپ، ايسۇلۋ ءوزىنىڭ ىشىنەن تەپكەنىن ايتتى. «ءبي الاڭىندا دوسىممەن بىرگە تار جولمەن ءوتىپ بارا جاتقانمىن، كەيىن ايقاي ەستىدىم دە ارتقا بۇرىلدىم. كىمنىڭ ايقايلاعانىن تۇسىنبەدىم. قاراسام، دوسىم قىزدى ۇستاپ تۇر، ول ايقايلاپ، بىرەۋدى ۇرعىسى كەلىپ جاتىر. ول مەنى تانىدى. دوسىم قىزدى سابىرعا شاقىردى. ول قىزدى بوساتقان كەزدە، قىز كەلىپ، مەنى ىشىمنەن ءبىر تەپتى. مەن ول تۋرالى ايتقىم كەلمەگەن، ءبىراق قازىر ساراپتامادان ءوتتىم، كوزىمنىڭ استىنا داق تۇسكەن»، - دەگەن بولاتىن ارتايەۆ.

اۆتور: ۋاليحان قوسانباي

«الاش ايناسى»