شەكارادان زاڭسىز مۇناي كىرگىزبەك بولعاندار ۇستالدى

استانا. قازاقپارات - قازاقستان-رەسەي شەكاراسىنداعى «اقساي» (باتىس قازاقستان وبلىسى) وتكىزۋ-باقىلاۋ بەكەتىنىڭ باقىلاۋشىلارى رەسەي فەدەراتسياسىنىڭ ازاماتىن ۇستادى، دەپ حابارلايدى ق ر ۇ ق ك باسپا ءسوز قىزمەتى.

اتالعان ازامات «MAN» اۆتوكولىگىمەن رەسەي فەدەراتسياسىنان ءبىزدىڭ ەلىمىزگە زاڭسىز جولمەن 28 توننا شيكى مۇنايدى الىپ وتۋگە تىرىسقانى انىقتالدى.

تەكسەرە كەلگەندە ونىڭ قولىندا اتالعان جۇككە سايكەس كەلەتىن قۇجات بولماي شىقتى.

ۇستالعان ازامات جۇگىمەن بىرگە باتىس قازاقستان وبلىسىنىڭ قارجى پوليتسياسىنا بەرىلدى.

«جاڭاجول» شەكارالىق باقىلاۋ بەكەتىنىڭ باقىلاۋشىلارى (سولتۇستىك قازاقستان وبلىسى) «سكانيا» اۆتوكولىگىمەن 40000 ليتر پەشكە جاعاتىن سۇيىق وتىندى زاڭسىز جولمەن ءبىزدىڭ ەلىمىزدەن رەسەيگە وتكىزبەك بولعان 50 جاستاعى رەسەي فەدەراتسياسىنىڭ ازاماتىن ۇستادى.

تەكسەرە كەلگەندە ماشيناداعى بەنزين جانارمايىنىڭ (ودان دا قىمبات جانارماي بولۋى مۇمكىن) قۇجاتتارى پەشكە جاعاتىن وتىن رەتىندە تولتىرىلعاندىعى انىقتالدى.

ساراپتاما جۇرگىزۋ ءۇشىن ۇستالعان جۇك قارجى پوليتسياسىنىڭ سولتۇستىك قازاقستان وبلىسى بويىنشا دەپارتامەنتىنە بەرىلدى.

ۇستالعان ازامات ق ر قىلمىستىق كودەكسىنىڭ 183-1- تارماعى بويىنشا قىلمىستىق جازاعا تارتىلۋى مۇمكىن (ۇلكەن كولەمدەگى مۇناي ونىمدەرىنىڭ الىنعان جەرىنەن دالەلەدەيتىن قۇجاتتارسىز تاسىمالداۋ، ساتىپ الۋ جانە ساقتاۋ).