تارازدا سوعىس كەزىندە الەكساندر ماتروسوۆتىڭ ەرلىگىن قايتالاعان قازاق جاۋىنگەرىنە قۇرمەت كورسەتىلدى

استانا. قازاقپارات - تارازدا كەڭەس وداعىنىڭ باتىرى ءاعادىل سۋحامبايەۆتىڭ ەسكەرتكىشىنىڭ الدىندا ونى ەسكە الۋگا ارنالعان جيىن ءوتتى، وعان ارداگەرلەر، جاستار، جالپى جۇرتشىلىق قاتىستى.

«وسىدان ناق جەتپىس جىل بۇرىن، 1944 - جىلدىڭ 31- شىلدە كۇنى جامبىل وبلىسىنىڭ شاعىن اۋىلىنان شىققان جاس جىگىت پولشا، بەلارۋس جانە ليتۆا ەلدەرىنىڭ توعىسىنداعى ستەجەلتسوۆيزنيا دەريەۆنياسىندا قانقۇيلى سوعىسقا قاتىستى. 628- اتقىشتار پولكىنىڭ ەكىنشى روتاسىنىڭ كومانديرى ءاعادىل سۋحامبايەۆ ەكى قولىنىڭ جارالانعانىنا قاراماستان، كەۋدەسىمەن كولەگەيلەپ، جاۋ دزوتىن بوگەگەن. وسى ەرلىگى ارقىلى ول كەڭەس جاۋىنگەرلەرىنە جول اشتى»، - دەدى ءوز سوزىندە جۋرناليست، جازۋشى، قوعام قايراتكەرى ارعىنباي بەكبوسىن.

«جاۋعا قارسى اتتان» اتتى مايداندىق گازەت ءاعادىل سۋحامبايەۆ تۋرالى بىلاي دەپ جازعان ەدى: «جاياۋ اسكەر ءاعادىل سۇحامبايەۆ الەكساندر ماتروسوۆتىڭ ولمەس ەرلىگىن قايتالادى. ول ولىمنەن قورىقپاي، جەڭىسكە جەتۋ جولىندا ءوز باسىن قۇربان ەتتى. سوڭعى رەت شابۋىلعا اتتانار الدىندا ول «كوزىم جۇمىلعانشا فاشيستەرمەن ايقاسىپ وتەمىن» دەگەن ەكەن. ول بۇل انتىن ورىندادى. جامبىلدىق جىگىتتى جولداستارى ءتيىستى قۇرمەتپەن جەر قوينىنا تاپسىردى، ال ونىڭ 2811 ءنومىرلى اۆتوماتىن جەرلەسى لوباتسيەۆيچ الدى، ول كەلەسى شابۋىلدا سول قارۋمەن 12 نەمىستىڭ كوزىن قۇرتتى».

قازىر باتىردىڭ اتىندا بايزاق اۋدانىندا اۋىلدىق وكرۋگ بار، سارىكەمەر اۋىلىندا، سونداي-اق تاراز، الماتى قالالارىندا كوشە اتى بەرىلگەن. ال بەلارۋستىڭ گرودنو قالاسىندا كاسىبي تەحنيكالىق ۋچيليشە عيماراتىندا ەسكەرتكىش تاقتا ورناتىلعان. ۇلى جەڭىستىڭ 60 جىلدىعىنا وراي تارازدا ا. سۋحامبايەۆقا ەسكەرتكىش ورناتىلدى. ال جەڭىستىڭ 65 جىلدىعىندا ونىڭ تۋعان اۋىلى قاراسۋدا (جامبىل وبلىسى، بايزاق اۋدانى) بيۋست ءمۇسىنى قويىلدى.