استانادا قازاقشا «گالاكتيكا ساقشىلارى» فيلمى كورسەتىلدى
فيلم دۋبلياجىنىڭ باس دەمەۋشىسى - «بايتەرەك» ۇلتتىق باسقارۋشى حولدينگى» ا ق. حولدينگ اپپاراتىنىڭ جەتەكشىسى انۋاربەك ءسۇلتانعازيننىڭ ايتۋىنشا، دۋبلياجعا شامامەن 9 ميلليون تەڭگە بولىنگەن.
«ءبىزدىڭ حولدينگ وسىنداي الەۋمەتتىك جوبالارعا بۇرىننان قولداۋ كورسەتىپ كەلەدى. فيلمگە دۋبلياج جاساۋعا دەمەۋشىلىك ەتۋىمىز بىرىنشىدەن قازاق ءتىلىنىڭ قولدانىلۋ اياسىن كەڭەيتۋ بولسا، ەكىنشىدەن دۇنيەجۇزى اسىعا كۇتەتىن، تاربيەلىك ماڭىزى زور وسىنداي دەڭگەيى جوعارى فيلمدەردى دۋبلياجداۋمەن تۇراقتى تۇردە اينالىسىپ كەلە جاتقان بولاشاق قاۋىمداستىعىنا قولداۋ كورسەتۋ»، - دەپ اتاپ ءوتتى ول.
ايتا كەتەيىك، قازاق ءتىلى «گالاكتيكا ساقشىلارى» ءفيلمىنىڭ كەيىپكەرلەرى سويلەگەن الەمدەگى اعىلشىن، فرانسۋز، نەمىس، يسپان، پورتۋگال، ورىس جانە باسقا دا تىلدەردىڭ قاتارىنداعى 18- ءتىل بولىپ وتىر.
«گالاكتيكا ساقشىلارى» بلوكباستەرىنىڭ باس كەيىپكەرى - جۇلدىزدى لوردتى وسىعان دەيىن دە فيلمدەردى قازاق تىلىنە دۋبلياجداۋ جۇمىسىنا قاتىسىپ جۇرگەن تيمۋر پيازوۆ دىبىستادى. ال «مالەفيسەنتا» ءفيلمى بويىنشا تانىمال بولعان گۇلناز اۋەسبايەۆا باس قاھارمانداردىڭ ءبىرى گامورانى دۋبلياجدادى. دۋبلياجدىڭ رەجيسسەرى كينەماتوگرافيا سالاسىنداعى جاس مامان تيمۋر بالىمبەتوۆ، ول ءۇشىن «ساقشىلار» دۋبلياج سالاسىنداعى العاشقى رەجيسسەرلىك تاجىريبە بولدى. دۋبلياج ادەتتەگىدەي «سينەما تون پروداكشن» قازاقستاندىق ستۋدياسىندا جاسالدى. بۇل Marvel, WaltDisney مەن SonyPictures ستۋديالارىنىڭ تۋىندىلارىنا دۋبلياج جاساۋعا رەسمي تىركەلگەن ستۋديا.
فيلمدەگى ازىلدەر، كەيىپكەرلەردىڭ ءرولىن اشا تۇسەتىن ۇرىمتال سوزدەر وتە جوعارى دەڭگەيدە اۋدارىلىپ، دىبىستالعان فيلم كورەرمەننىڭ كوڭىلىنەن شىعىپ، جوعارى باعاسىن الدى. ەندى ول ەلىمىزدىڭ كينوتەاترلارىنان كورسەتىلەتىن بولادى.
اۆتور: ءابۋ-اسقار مەكەش ۇلى
