ەلباسى ەرەكشە نازار اۋدارىپ، جولداۋدا اتاپ وتكەن وتباسى بيزنەسى وسى - م. جۇمابايەۆ

ورال. قازاقپارات - ەلباسىمىز ەل تۇرعىندارىنىڭ ەڭبەكپەن ەتەنە بولىپ، تۇرمىس-مادەنيەتىنىڭ جاقسارا ءتۇسىپ، تۇپتەپ كەلگەندە، قازاقستاننىڭ الدىڭعى قاتارلى مەملەكەتتەر قاتارىنا قوسىلۋىن باستى ماقسات ەتىپ وتىر. بۇل تۋرالى تاسقالا اۋدانى ورتالىعىندا تۇراتىن اعاش شەبەرى مالىك جۇمابايەۆ ءمالىم ەتتى.

قۇرىلىسشى بولىپ ەڭبەك جولىن باستاعان ول اعاش جونۋمەن 1990- جىلدان اينالىسا باستاعان. ال 2003- جىلدان باسقا جۇمىستى قويىپ، اعاشتان بۇيىم جاساۋعا ءبىرجولا كوشكەن. ونىڭ شاعىن سەحىندا كەرەكتى قۇرالدىڭ ءبارى بار. شەبەر پايدالاناتىن ءار تاقتايدى ىقىلاسپەن قولىنا الىپ، بابىمەن استى-ءۇستىن قاراپ بارىپ سالادى. «اعاش وتە قىراعىلىقتى قاجەت ەتەدى. ونىمگە قيسىق، شادىر، بولماسا جارىلۋى مۇمكىن تاقتايدى پايدالانۋعا بولمايدى. ولار ەرتەڭ جەلىمى كەپكەننەن كەيىن قاقىراپ قالادى. سوندىقتان، ءار قوسالقى بولشەك ءوز ورنىن دۇرىس تابۋى ماڭىزدى. سيىقسىز، بولماسا ورنىن دۇرىس تاپپاعان ءبىر تاقتايشا جاسالعان زاتتىڭ بارلىق ءسانىن بۇزىپ، عۇمىرىن قىسقارتادى. قولىڭنان شىققان دۇنيەگە نەمقۇرايلى قاراۋعا مۇلدەم بولمايدى»، - دەيدى اعاش شەبەرى.

ونىڭ دەنساۋلىعى اسا مىقتى ەمەس. بىرنەشە جىل توسەك تارتىپ جاتىپ تا قالعان. ايتەۋىر بويىن تىكتەپ، سۇيىكتى كاسىبىن جالعاستىرىپ كەلەدى. م. جۇمابايەۆ كاسىبىن دامىتۋ ءۇشىن «جۇمىسپەن قامتۋ - 2020» باعدارلاماسى بويىنشا 2 ميلليون تەڭگە نەسيە العان. قازىر قوسىمشا ستانوكتار اكەلىپ قويىپتى. - بۇل جاڭا قۇرال-جابدىقتار جۇمىستى اجەپتاۋىر جەڭىلدەتەدى. وسىعان دەيىن اعاشقا ورنەكتى بۇرىنعى ستانوكپەن سالىپ كەلسەك، ەندى ءوزى اينالاتىن جاڭا تۇرپاتتى قۇرال الدىق. سونىمەن بىرگە تاقتايدى تەگىستەپ سۇرگىلەيتىن، وزگە دە مۇمكىندىككە يە جاڭا ستانوكقا قول جەتكىزىپ جاتىرمىز. ءبارى دە - ەلدەگى تۇراقتى ساياسات پەن مەملەكەتتىڭ قاراپايىم حالىققا قامقورلىعىنىڭ ارقاسى، - دەيدى مالىك جۇمابايەۆ.

 

 جاڭادان اكەلىنگەن زاماناۋي جابدىقتار ءالى ىسكە قوسىلماعان. وعان سەح عيماراتى شاعىنداۋ بولىپ، مۇمكىندىك بەرمەي تۇرعان كورىنەدى. الداعى ۋاقىتتا قوسىمشا قۇرىلىس جۇرگىزۋ جوسپاردا.

شەبەردىڭ قوس ۇلى مەدەت پەن مەرەي اكەلەرىنە كومەكتەسە ءجۇرىپ، اعاششىلىقتىڭ قىر-سىرىن بارىنشا مەڭگەرگەن. قولدارى قالت ەتكەندە، اكەلەرىنىڭ قاسىنان تابىلىپ، كومەكتەسەدى. مەدەت - استانا قالاسىنداعى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ تۇلەگى. ەكونوميست. مەرەي - قۇرىلىسشى.

مالىك ۇستا، ءبىر سوزبەن ايتقاندا، ساز اسپابىنان باسقا ەسىك-تەرەزەدەن باستاپ، بارلىعىن دا قولدان شىعارادى. سونىڭ ىشىندە ويۋلى بەسىكتى ەرەكشە اتاپ وتۋگە بولادى.

ەلباسى ەرەكشە نازار اۋدارىپ، جولداۋدا اتاپ وتكەن وتباسى بيزنەسى وسى بولسا كەرەك-ءتى.