ەۋروپا ليگاسى: قازاقستاندىق «شاحتەر» حورۆاتيالىق «حايدۋك» كومانداسىن جەڭدى

استانا. قازاقپارات - قاراعاندىلىق «شاحتەر» فۋتبول كلۋبىنىڭ ويىنشىلارى ەۋروپا ليگاسىنىڭ ءۇشىنشى راۋندىندا ءوز الاڭىندا «حايدۋك» كومانداسىن 4:2 ەسەبىمەن تىزە بۇكتىردى.

ءبىرىنشى تايمدا العاشقى شابۋىلدا- اق قاراعاندىلىقتار ەسەپ اشتى. گولدى ۆيديچتىڭ اۋتتان بەرىلگەن پاسىنان كەيىن ميحرەت توپچاگيچ قاقپانى نىساناعا ءدال الدى. سەگىز مينۋتتان سوڭ قارسىلاستار ساندرو گوتالدىڭ ارقاسىندا ەسەپتى تەڭەستىرە الدى. الايدا ءبىر مينۋت وتەر- وتپەستەن فينونچەنكو سول باياعى ۆيديچتىڭ اۋتتان لاقتىرعان دوبىن قارسىلاستاردىڭ قاقپاسىنا توعىتىپ كەتتى.

ەكىنشى تايمدا قاراعاندىلىقتار باسىمدىقتى حورۆاتيالىقتاردىڭ قولىنا بەرىپ قويعانمەن، قارسىلاستار قاقپاسى ماڭىندا بەلگىلەنگەن بۇرىشتاما سوققىسى كەزىندە الدين دجيديچ باسپەن گول سالىپ، «شاحتەردى» 3:1 ەسەبىمەن العا شىعاردى. وسى ەسەپ الاڭ يەلەرى ءۇشىن ءساتتى بولارى انىق ەدى, دەگەنمەن تايمنىڭ ورتا تۇسىندا قاراعاندىلىقتارعا پەنالتي بەرىلدى. «حايدۋك» فۋتبولشىسى ونى قاتەلىكسىز ورىنداپ، ءوز كومانداسىنىڭ ەكىنشى گولىن سالدى.

 وسىدان كەيىن «شاحتەر» كلۋبىنىڭ باس باپكەرى الاڭعا شابۋىلشى توقتار جانقىلىشبايدى شىعاردى جانە جاڭىلعان جوق. سوڭعى مينۋتتاردا ول ماتچتىڭ ەڭ ادەمى گولىنىڭ اۆتورى اتاندى. ورتادان پاس العان توقتار جانقىلىشباي الىس بۇرىشقا تەۋىپ، قاقپاشىعا ەش مۇمكىندىك بەرمەدى.

 

 اۆتور: جاسۇلان جولدىبايەۆ