گولوۆكيننەن بارلىق بوكسشى قاشقاقتاپ ءجۇر
بۇل گەنناديدىڭ 2014 - جىلعى جوسپارلاعان ەكىنشى كەزدەسۋى بولدى، دەپ جازادى «الاش ايناسى» گازەتى.
نەگىزى 2014 - جىلى گەننادي گولوۆكين ءتورت كەزدەسۋ وتكىزەتىنىن ايتقان ەدى. ونىڭ ازىرشە وتانداسىمىز ەكى كەزدەسۋىن وتكىزىپ، ەكەۋىندە دە قارسىلاستارىن سۇلاتىپ سالدى. ەندى ءبىزدىڭ بىلعارى قولعاپ شەبەرىمىز بۇل جىلى وتەتىن ءۇشىنشى كەزدەسۋىندە اتاعى الىسقا كەتكەن بوكسشىمەن جۇدىرىقتاسۋعا نيەتتى. وسى ورايدا «الاش ايناسىنىڭ» ءتىلشىسى گولوۆكيننىڭ الداعى ۋاقىتتا جۇدىرىقتاسىپ قالۋى مۇمكىن دەگەن قارسىلاستاردى تىزبەكتەپ شىعۋدى ءجون كورىپ وتىر.
ءسوزسىز، ءبىرىنشى كەزەكتە جانكۇيەرلەر دە ماماندار گەنانىڭ پۋەرتو- ريكالىق ميگەل انحەل كوتتومەن جۇدىرىقتاسقانىن قالايدى. 33 جاستاعى كوتتا قازىرگى تاڭدا WBS تۇجىرىمىنىڭ چەمپيونى بولىپ سانالادى. ول وسى ۋاقىتقا دەيىن شارشى الاڭعا 43 كەزدەسۋ وتكىزىپ، ونىڭ 39 ىندا جەڭىسكە جەتسە، 32 كەزدەسۋدى ۋاقىتىنان بۇرىن اياقتاعان. كوتتو ءوزىنىڭ كاسىپقوي بوكستاعى جەكپە- جەكتەرىندە تەك كىشى فلويد مەيۆەزەر، مەنني پاكياو، وستينا تراتۋتا جانە انتونيو مارگاريتو سىندى بوكسشىلاردان جەڭىلىپ قالعان.
وسى اپتانىڭ باسىندا گولوۆكيننىڭ پروموۋتەرى توم لەففەر الداعى ۋاقىتتا گولوۆكينمەن كوتتو اراسىنداعى چەمپيوندىق اتاقتى بىرىكتىرەتىن جەكپە- جەكتى ۇيىمداستىرامىن دەگەن ەدى. ءبىراق، بۇگىن پۋەرتو- ريكالىق بوكسىشىنىڭ پروموۋتەرى بوب ارۋم بۇل كەزدەسۋدىڭ ولار ءۇشىن ماڭىزى جوق ەكەنىن ايتتى. «ءبىرىنشى كەزەكتە الداعى ۋاقىتتا كىممەن جۇدىرىقتاساتىنىن ميگەلدىڭ ءوزى شەشەدى. دەگەنمەن مەن گولوۆكينگە قارسى جەكپە- جەككە قاراعاندا ساۋل الۆارەسكە قارسى وتەتىن كەزدەسۋ قىزىقتى بولادى دەپ ويلايمىن» ، - دەيدى ارۋم.
كوتتودان كەيىنگى كەزەكتە كىشى حۋليو سەزار چاۆەس تۇر. نەگىزى بۇل ەكى بوكسشى وسى ايدا ءوزارا جەكپە- جەك وتكىزۋ كەرەك ەدى. ءبىراق، مەكسيكالىق بوكسشى بۇل جەكپە- جەك ءۇشىن وزىنە سىياقىنىڭ از بەرىلەتىنىن العا تارتىپ، گەنناديگە قارسى شىعۋدان باس تارتتى. ايتا كەتەيىك، چاۆەس وسى ۋاقىتقا دەيىن كاسىپقوي رينگ شارشى الاڭىنا 51 مارتە كوتەرىلىپ، ونىڭ 48 كەزدەسۋىندە جەڭىمپاز بولىپ كەتكەن.
قازىر كوپتەگەن امەريكالىق باق وكىلدەرىندە گولوۆكينگە سەم سوليماننىڭ لايىقتى قارسىلىق كورسەتە الاتىنىن جازىپ ءجۇر. ول بۇگىنگى تاڭدا IBF تۇجىرىمىنىڭ چەمپيونى. 40 جاستاعى بوكسشى 53 كەزدەسۋ وتكىزىپ، ونىڭ 44 ىندە جەڭىسكە جەتكەن. ءبىراق، سوليماننىڭ ءوزى گەنناديمەن كەلەر جىلدىڭ ناۋرىز نە ءساۋىر ايىندا عانا جۇدىرىقتاسامىن دەپ وتىر. «گولوۆكيننىڭ گيلگە قارسى وتكىزگەن كەزدەسۋىن تاماشالادىم. بۇل جەكپە- جەككە دەنيەل دۇرىس دايىندالماي شىقتى. بوكستا ستيل دەگەن دۇنيە بار. گيلدىڭ بۇل كەزدەسۋدەگى ءستيلى دۇرىس بولعان جوق. دەگەنمەن دە گولوۆكيننىڭ مىقتى بوكسشى ەكەنىن مويىندايمىن. مەنىڭ وسى جىلدىڭ سوڭىندا ءبىر جەكپە- جەگىم بار. قازىر سوعان دايىندالىپ جاتىرمىن. ەگەر، مۇمكىندىك بولىپ جاتسا، مەن گەنناديمەن كەلەر جىلدىڭ ناۋرىز نەمەسە ءساۋىر ايىندا جۇدىرىقتاسۋعا دايىنمىن» ، - دەيدى سەم.
گەنناديگە لايىقتى قارسىلاستاردىڭ ءبىرى دەپ پيتەر كۋيلليندى ايتۋعا بولادى. ول بۇگىندە ورتا سالماقتاعى WBO تۇجىرىمىنىڭ چەمپيونى. پيتەر 31 كەزدەسۋ وتكىزىپ، بارلىعىندا جەڭىسكە جەتكەن. ءتىپتى ونىڭ 22 سىندە ول جەكپە- جەكتى ۋاقىتىنان بۇرىن اياقتادى. گولوۆكيننىڭ پروموۋتەرلەرى جىلدىڭ باسىندا بۇل بوكسشىنىڭ كومانداسىمەن كەلىسسوز جاساعان ەدى. ءبىراق، ءساتسىز بولدى. ەندى الداعى ۋاقىتتا وتانداسىمىزعا تاعى دا قارسىلاس تابىلمايتىن بولسا، وندا توم لەففەر پيتەرگە قايتا ۇسىنىس جاساۋعا دايىن.
وتانداسىمىزدىڭ بۇل جىلداعى باستى جەكپە- جەگى 2005, 2006, 2007, 2012 جانە 2013 - جىلدارداعى سالماق دارەجەسىنە قاراماستان، الەمنىڭ ۇزدىك بوكسشىسى اتانعان كىشى فلويد مەيۆەيزەرگە قارسى بولۋى ىقتيمال. فلويد بۇگىندە WBC جانە WBA تۇجىرىمدارىنىڭ چەمپيونى. ءبىراق، بۇل جەكپە- جەككە شىعۋ ءۇشىن گولوۆكين سالماعىن 69 كەلىگە دەيىن ءتۇسىرۋ كەرەك. سوندىقتان دا بۇل كەزدەسۋ بيىل بولمايتىن دا شىعار.
مىنە، الداعى ۋاقىتتا وتانداسىمىز گەننادي گولوۆكين ءبىز سانامالاپ وتكەن مىقتى بوكسشىلاردىڭ بىرىمەن قولعاپ ءتۇيىستىرىپ قالۋى مۇمكىن. ەگەر، بۇل بوكسشىلاردىڭ بارلىعى دا كەلىسىم بەرمەسە، لوم لەففەر باسقا قارسىلاس ىزدەستىرەتىن بولادى. قازىرشە گولوۆكين ءوزىنىڭ سوڭعى جەكپە- جەگىنەن كەيىنگى كەزەكتى دەمالىسىندا. ونىڭ جەكە باپكەرى ابەل سانچەس گەننادي كەلەسى كەزدەسۋىن ەكى بولماسا ءۇش ايدان كەيىن لوس- اندجەلەس نەمەسە لاس- ۆەگاستا وتكىزەدى دەيدى.
اۆتور: ءۋاليحان قوسانباي
