كورشىمىزدەن قورقاتىن بولدىق

استانا. قازاقپارات  -وتاندىق تۋريزم سالاسىنىڭ وكىلدەرىنەن مازا قاشتى. ولار «جەپ وتىرعان نانىمىزدان» ايىرىلىپ قالامىز با دەپ قورقادى.

ايتۋلارىنشا، مىڭداعان ءتۋريستى تاقىرعا وتىرعىزىپ كەتكەن «گۇلنار تۋر» توڭىرەگىندەگى داۋدان كەيىن، قازاقستانداعى تۋريزم نارىعىنا رەسەيلىك اگەنتتىكتەر كەلىپ جاتىر. ولاردىڭ كەيبىرىندە ۇشاقتارى، جەكە اۋە جەلىسى دە بار. سونداي-اق، جولدامالاردى قازاقستاندىق فيرمالارعا قاراعاندا الدەقايدا ارزان باعاعا ۇسىنىپ وتىر.

وسىلاي دەپ باسەكەلەستەرىنىڭ مۇمكىندىگىن جىپكە تىزگەن وتاندىق تۋريزم وكىلدەرى، بۇل جاعداي وزدەرىن دارمەنسىز كۇيگە ءتۇسىرىپ قانا قويماي، بيزنەستەرىن بانكروتقا ۇشىراتۋى مۇمكىن دەيدى.

«ارزاننىڭ اتى ارزان ەمەس پە، ولاردىڭ ۇشاقتارىنىڭ نەمەسە قوناق ۇيلەرىنىڭ ساپاسى سىن كوتەرمەۋى مۇمكىن. دەمەك، سىرتتان كەلگەن تاسىمالداۋشىنىڭ ەرتەڭ «گۇلنار تۋردىڭ» كەبىن كيىپ، قاشىپ كەتپەۋىنە كىم كەپىل. سونداي جاعداي بولا قالسا، ءبىز ولارعا نە ىستەي الامىز؟»، - دەيدى تاسىمالداۋشى اسەل نۇركەبايەۆا.

«پەگاس» سياقتى الپاۋىتتار ءبىزدىڭ نارىقتى قۇردىمعا ۇشىراتۋى مۇمكىن. ءوز باسىم «پەگاسپەن» ماسكەۋگە ۇشقانمىن. ولار وتە ءىرى كومپانيا، جەكەمەنشىك ۇشاقتارى دا بار. مەنشىگىندە ۇشاقتارى بار كومپانياعا ءبىزدىڭ نارىقتا كىم لايىقتى باسەكەلەس بولا الادى؟ ەشكىم»، - دەيدى بيزنەس-كەڭەسشى دەنيس كريۆوشەيەۆ.

استانا تەلەارناسى