سپورت سيقىرىنا اربالعاندار
«جوق جومارتتىڭ قولىن بايلايدى» دەمەكشى، كوپتەگەن دارىندى ۇل- قىزدار سونىڭ سالدارىنان ءوز نەسىبەلەرىنەن قاعىلۋدا. كەيبىر اتا- انالار بالالارىن باسقا قالا نەمەسە وزگە مەملەكەتتەردە وتەتىن جارىستارعا اپارۋ ءۇشىن قوراسىنداعى مالىن ساتىپ، تۋعان- تۋىستارىنان قارىز العانى جايىندا تالاي مارتە ەستىدىك. نەسيەگە بەلشەسىنەن باتقاندارى دا بار. ال ءبىزدىڭ بۇگىنگى اڭگىمەمىز ءدۇبىرلى دودالارعا قاتىسۋ ءۇشىن تاۋەكەلگە بەل بۋىپ، ءتۇرلى ارەكەتتەرگە بارعان ساقا سپورتشىلار جايىندا.
2010 -جىلى كانادانىڭ ۆانكۋۆەر قالاسىندا قىسقى وليمپيادا ويىندارى وتكەنى بەلگىلى. سول جارىس قارساڭىندا وسى ەلدىڭ بىرنەشە بياتلونشىسى قارجى تاپشىلىعىنا تاپ بولعان ەكەن. مەملەكەت تاراپىنان كومەك بولماعان سوڭ، ساندرا كەيت پەن زينا كوچەر اقشا تابۋدىڭ وزگە جولىن ىزدەدى. ءوز قۇربىلارىنا مەگام يمري، روزاننا كروۋفورد جانە ماگام تەندي سىندى سپورتشىلار قولداۋ كورسەتتى. ءسويتىپ، قىزدار جارتىلاي جالاڭاش كەيپىندە سۋرەتكە ءتۇسىپ، ەروتيكالىق كۇنتىزبە شىعاردى. ول بىرنەشە مىڭ دانا تارالىممەن ساتىلىمعا شىقتى. سۇلۋ قىزداردىڭ سۋرەتى لەزدە تاراپ كەتتى. بۇل كۇنتىزبە كانادادان بولەك، گەرمانيا، ا ق ش جانە وڭتۇستىك كورەيادا ساتىلدى. سول ساتىلىمنان بياتلونشىلار 100000 كانادالىق دوللار كولەمىندە پايدا كوردى. سول قاراجاتتىڭ بارلىعىن سپورتشىلار وليمپيادا ويىندارىنا ەش الاڭسىز دايارلانۋ ءۇشىن جۇمسادى.
سوچي وليمپياداسى قارساڭىندا پولشانىڭ قوس شورت- ترەكشىسى مارتا ۆويچيك پەن ايدا بەللا دا سونداي ارەكەتكە باردى. قوس بويجەتكەن وزدەرىنىڭ بار «بايلىعىن» كورسەتىپ، «پلەيبوي» جۋرنالىنا ءتۇستى. سودان كورگەن پايدانى باسى ءبۇتىن دايارلىق جۇمىستارىنا جۇمسادى. ءبىراق قارا تەڭىز جاعالاۋىنا ولاردىڭ جولى تۇسپەدى. ويتكەنى ىرىكتەۋ تۋرنيرىندە ەكەۋى دە ساتسىزدىككە ۇشىرادى.
2007 - جىلى جاپونيانىڭ وساكا قالاسىندا جەڭىل اتلەتيكادان الەم چەمپيوناتىندا فرانتسيانىڭ سىرىقپەن سەكىرۋشىسى رومان مەسنيل 5 مەتر، 86 سانتيمەترلىك كورسەتكىشپەن ەكىنشى ورىن يەلەندى. ول تەك ا ق ش سپورتشىسى برەد ۋوكەردەن عانا قالىپ قويدى. كەلەسى دۇنيەجۇزىلىك دودا 2009 - جىلى گەرمانيانىڭ باس شاھارىندا ءوتتى. ءبىراق بەرليندەگى جارىستان مەسنيلدىڭ ولجالى ورالاتىنىنا كۇماندانعان باسشىلار وعان قىرىن قاراي باستادى. دايىندىق جۇمىستارىنا قاراجات بولمەي، ايتۋلى سپورتشىنى ءبىراز ابىگەرگە سالدى. العاشىندا رومان ءتۇرلى كەڭسەنىڭ تابالدىرىعىن توزدىرىپ، الاقان جايىپ اقشا سۇرادى. الايدا بۇل ارەكەتى ناتيجە بەرمەدى. سودان ول تاۋەكەلگە بەل بۋدى. مەتسەناتتاردىڭ نازارىن وزىنە اۋدارۋ ءۇشىن قولىنا سىرىق ۇستاپ، تىر جالاڭاش كۇيدە پاريجدىڭ ەڭ ءىرى كوشەلەرىمەن جۇگىرىپ ءوتتى. جالاڭاش كەيپىندە تۇسكەن فوتو مەن بەينەماتەريالدى «Youtube» سايتىنا جاريالادى. ناتيجەسى كەرەمەت بولدى. كوپتەگەن ادامدار الەمنىڭ ۆيتسە- چەمپيونىنا قولداۋ كورسەتتى. قىسقا عانا مەرزىمدە مەسنيل 25000 ەۋروعا يەلىك ەتتى. قۋانىشى قوينىنا سىيماعان جەڭىل اتلەت بەرليندە بارىن سالدى. كوپتەگەن مىقتى سپورتشىلارعا سان سوقتىرعان رومان ەكىنشى مارتە كۇمىس مەدالدى موينىنا ءىلدى. كورسەتكىشى - 5 مەتر، 85 سانتيمەتر. بۇل جارىستا ول تەك اۆستراليالىق ستيۆ كۋۆەردەن عانا قالىپ قويدى.
34 جاستاعى نورۆەگيانىڭ شاڭعىشىسى ءارى بياتلونشىسى لارس بەرگەردىڭ ءومىرى دە توسىن وقيعالارعا تولى. جاستايىنان دارا تالانتىمەن وقشاۋلانعان ول ەستافەتالىق سايىستا ۆانكۋۆەر وليمپياداسىندا كۇمىس جۇلدەگەر اتاندى. 2005-2009 - جىلدار ارالىعىندا وتكەن الەم چەمپيوناتتارىندا جوعارىدا اتالعان سپورتتىڭ قوس ءتۇرى بويىنشا 4 التىن مەن 5 كۇمىس مەدالدى قانجىعاسىنا بايلادى. الەم كۋبوگىندا 11 رەت جەڭىمپاز اتانىپ، 27 رەت جۇلدەگەرلەر ساناتىنا قوسىلدى. الايدا سوڭعى جىلدارى ناتيجەسى ءبىراز ناشارلاپ كەتكەن بولاتىن. سودان بياتلوننان نورۆەگيا قۇراماسىنىڭ باس باپكەرى اۆستريادا وتكەن الەم كۋبوگىنىڭ كەزەڭدىك جارىسىنا بەرگەردى اپارماۋدى ءجون كوردى. سوعان نامىستانعان ساڭلاق ايتۋلى جارىسقا ءوز قاراجاتىمەن بارۋعا بەكىندى. لارس جيعان اقشاسىنىڭ بارلىعىن شىعارىپ، جەتپەگەنىن بيزنەسمەن دوستارىنان الىپ، الەم كۋبوگىنا اتتاندى. اۆستريادا ايدى اسپانعا شىعارعان سكانديناۆيا تۇبەگىنىڭ ساڭلاعى باس جۇلدەنى ولجالادى. سودان كەيىن بارىپ لارس بەرگەرگە دەگەن باپكەرلەردىڭ كوزقاراسى كۇرت وزگەرىپ، ول ءدۇبىرلى دودالارعا قايتا قاتىسا باستادى.
امەريكالىق پول برەگيەلدىڭ دە باستان كەشىرگەن وقيعاسى كوپشىلىكتىڭ قىزىعۋشىلىعىن تۋدىرعانى انىق. ول ەشۋاقىتتا ەشتەڭەدەن تارلىق كورگەن ەمەس. ءوزىنىڭ تىرلىگى بار، بيزنەسى ورگە دومالاپ تۇر. ۇلدە مەن بۇلدەگە ورانعان ازاماتتاردىڭ دا كۇيبەڭ تىرشىلىكتەن جالىعىپ، كەي كەزدەرى ىشتەرى پىسادى ەكەن. سودان ول تاۋەكەلگە بەل بۋدى. 38 جاسىندا سوچيدەگى وليمپيادا ويىندارىنا بارۋدى ماقسات تۇتتى. بۇل رەتتە پول تۋريست رەتىندە ەمەس، سپورتشى رەتىندە قارا تەڭىز جاعالاۋىنا ات باسىن بۇرۋدى ارماندادى. وسى جوسپارىن جۇزەگە اسىرۋ ءۇشىن بىلىكتى باپكەر جالدادى. ەۋروپاعا ساپار شەگىپ، سول جاقتا شاڭعى سپورتىنىڭ قىر- سىرىنا قانىقتى. جاڭا زەلانديا مەن اۆسترالياعا بارىپ، وقۋ- جاتتىعۋ جيىنىن وتكىزدى. وسى شارالارعا قاجەتتى شىعىنداردىڭ بارلىعىن ءوز قالتاسىنان جۇمسادى. ەرەن ەڭبەگى ەش كەتپەي، بىرتە- بىرتە برەگيەلدىڭ شەبەرلىگى شىڭدالا ءتۇستى. ا ق ش قۇراماسى ساپىنا ىلىگە المايتىنىن تۇسىنگەن ول 2013 - جىلى كولۋمبيا ازاماتتىعىن الادى. وكىنىشكە قاراي، وليمپيادا ويىندارىنا قاتىسۋعا مۇمكىندىك بەرەتىن جولداما بيزنەسمەنگە بۇيىرمادى. الايدا برەگيەل ەشتەڭەگە وكىنبەيدى. ەسەسىنە شاڭعى سپورتىن سەرىك ەتكەلى بەرى ول بىرنەشە ءدۇبىرلى دودالارعا قاتىستى. جارىس جولىنا شىققان سايىن ەرەكشە كۇي كەشىپ، وسى ەرمەگىنەن ءلاززات الدى. ەڭ باستىسى، پول 15 كەلى سالماق تاستاپ، قازىر سىمداي تارتىلعان جىگىت بولىپ شىعا كەلدى.
ا ق ش سپورتشىسى لولو دجونستىڭ ەسىمى جانكۇيەرلەرگە جاقسى تانىس. 60 جانە 100 مەترگە كەدەرگىلەر ارقىلى جۇگىرۋدە ول ءوز ەلىنىڭ بىرنەشە دۇركىن چەمپيونى. تالاي رەت رەكوردتىق كورسەتكىشتەرگە دە قول جەتكىزدى. 2008 - جىلى ۆالەنسيادا، 2010 - جىلى دوھادا وتكەن جابىق عيماراتتاعى الەم چەمپيوناتتارىندا الدىنا جان سالماي، التىننان القا تاعىندى. باسقا دا اسا ءىرى حالىقارالىق جارىستاردا جەڭىپ العان جۇلدەلەرى جەتەرلىك. 2008 - جىلى بەيجىڭدە وتكەن وليمپيادا ويىندارىندا امەريكالىق ارۋدىڭ جەڭىس تۇعىرىنا كوتەرىلۋىنە مۇمكىندىگى بولدى. الايدا ابايسىزدا ءسۇرىنىپ كەتىپ، ناتيجەسىندە 7 - ورىندى قاناعات تۇتتى.
وليمپيادا ويىندارىندا جۇلدە الۋ - ءار سپورتشىنىڭ ارمانى. سوندىقتان دا بارلىق مىقتىلار وسى جارىستا بارىن سالۋعا تالپىنادى. لولونىڭ دا كوزدەگەنى باس جۇلدە ەدى. 2012 - جىلى لوندوندا جالاۋى جەلبىرەگەن جارىسقا ول ساقاداي- ساي ازىرلىكپەن اتتانادى. الايدا 100 مەترگە كەدەرگىلەر ارقىلى جۇگىرگەن جەلاياقتار سايىسىندا 4- ورىندا قالىپ قويادى. تۇماندى البيون ەلىندە ورىن العان جاعداي دجونستىڭ كوڭىلىنە سەلكەۋ تۇسىرەدى. سودان ول جەڭىل اتلەتيكادان قول ءۇزىپ، باسقا سپورت تۇرىمەن اينالىسۋعا بەكىندى. «تاۋەكەل ءتۇبى - جەلقايىق» دەدى دە، بوبسلەيدى تاڭدادى. بۇل - كوپ كۇش- جىگەردى قاجەت ەتەتىن ونەر. سوندىقتان دا لولاعا 15 كەلى سالماق قوسۋعا تۋرا كەلدى. العاشىندا ەركە قىزدىڭ بۇل ەرمەگىن كوپشىلىك قۇپتامادى. وسى جاڭالىقتى ەستىگەن جۇرت «قىسقى جانە جازعى سپورت تۇرلەرىنىڭ ايىرماشىلىعى جەر مەن كوكتەي. بوبسلەيدە ول نە بىتەرەر ەكەن؟ » دەپ ميىعىنان كۇلدى. ءبىراق كوپ ۇزاماي جوعارىداعىداي پىكىر ايتقان ادامداردىڭ اۋىزدارىنا قۇم قۇيىلدى. 2013 - جىلى لولو دجونس بوبسلەيدەن الەم چەمپيونى اتانىپ، سوچي وليمپياداسىندا باق سىناۋ قۇرمەتىنە يە بولدى.
31 جاستاعى لولا دجونس ەندى وسى قوس سپورت ءتۇرىن قاتار الىپ ءجۇرۋدى كوزدەۋدە. جازدا جەڭىل اتلەتتەر سايىسىنا تۇسسە، قىس مەزگىلىندە بوبسلەيشىلەر اراسىندا باق سىناۋدى كوزدەۋدە.
عالىم سۇلەيمەن
«ايقىن»
