كونسۋلىمىز قايدا ءجۇر؟
ۆەدومستۆونىڭ باسپا ءسوز حاتشىسى نۇرجان ايتماحانوۆ ازىرگە ەشقانداي مالىمدەمە بولمايدى دەدى.
كەي بۇقارالىق اقپارات قۇرالدارىنىڭ اقپارىنا سۇيەنسەك، نورۆەگياداعى كونسۋل قىزمەتىنە بىلتىر كىرىسكەن قۋانىش اقايداروۆ بىرنەشە ورەسكەل ارەكەتىمەن كوزگە تۇسكەن. وعان قىزمەتتىك قۇجاتتاردى جىمقىردى جانە قىمبات الكوگول ونىمدەرىن ۇرلادى دەگەن كۇدىك تە كەلتىرىلدى.
ەكى جىلدان استام ديپلوماتيالىق قىزمەتتە جۇرگەن اقايداروۆ اعىلشىن ءتىلىن دە بىلمەيتىن بولىپ شىقتى. سونىمەن قاتار ونىڭ ارىپتەستەرىمەن قارىم-قاتىناس ورناتا الماعانى، قىزمەتتىك كولىگىن بوتەن بىرەۋگە بەرىپ وتىرعانى ءمالىم بولدى.
اقايداروۆ ءوزىنىڭ تىكەلەي باسشىسى - قازاقستاننىڭ نورۆەگياداعى ەلشىسى اسقار تاجيەۆكە دە باعىنباعان كورىنەدى. اقىرى ەلشى سىرتقى ىستەر مينيسترلىگىنە حات جولداۋعا ءماجبۇر بولعان دەگەن اقپار بار. ورتالىقتان ونى دەرەۋ استاناعا قايتارۋ تۋرالى بۇيرىق تۇسكەن.
الايدا اقايداروۆ مورلەر مەن ءتيىستى قۇجاتتارىن تاپسىرماستان بەلگىسىز باعىتقا كەتىپ قالادى. وسلودا ول شەتەلدىكتەرگە ۆيزا بەرۋ ماسەلەلەرىنە جاۋاپتى بولعان.
«ايقىن»
