قازاقستاننان شىققان «شوقان ءۋاليحانوۆ كەرۋەن جولى بويىمەن» جۇلدىزدى تەڭىزگە تۇراقتادى
قازاقستاندىق جيھانكەزدەر قاراشاھار قالاسىنا كەلىپ جەتكەننەن كەيىن قالادا ۇزاق ۋاقىت تۇراقتاپ قالا المادى. ازداپ الدەنىپ العاننان سوڭ ولار قىتاي ەلىنىڭ باقراشەكەل دەپ اتالاتىن تۇششى وزەنىنە قاراي اتتانعان. كەرۋەننىڭ عىلىمي جەتەكشىسى سمايىلجان يمينوۆتىڭ ايتۋىنشا، ەجەلگى داۋىردە وسى ءبىر وزەندى «باتىس تەڭىزى» نەمەسە «بالىق تەڭىزى» دەپ اتاسا كەرەك.
وزەندى ءتۇرلى وسىمدىكتەر قورشاعان بولسا، كوك اسپاندا بىزگە بەلگىسىز قۇس تۇرلەرى سامعاپ ۇشادى ەكەن. مۇندا تاپ بولعان وزگە ەل مەيماندارى بەينە ءبىر تەڭىز، ءتىپتى مۇحيت القابىندا جۇرگەندەي كۇي كەشەتىن كورىنەدى.
باقراشەكەلدى ارتتا قالدىرىپ، ساياحاتشىلارىمىز قورلا قالاسى ارقىلى تىكەلەي شوقان ۋاليحانوۆ اتامىز «جۇلدىزدى تەڭىز» اتاعان لوبنور وزەنىنە توقتاپ، ارى قاراي تاكلاماكان ءشول دالاسىنا ءىس-ساپارلارىن جالعاستىردى.
ەستەرىڭىزگە سالا كەتسەك، بۇل عىلىمي- تانىمدىق ەكسپەديتسيا شوقان ءۋاليحانوۆتىڭ تۋىلعانىنا 180 - جىل تولۋىنا وراي «قازاقستاننىڭ ۇلتتىق گەوگرافيالىق قوعامىنىڭ» رەسپۋبليكالىق-قوعامدىق جوباسى رەتىندە ءوز باستاۋىن العان بولاتىن. ساپار كەزىندە جوبا قاتىسۋشىلارى شوقان ءۋاليحانوۆ اياق باسقان جەرلەرمەن وتۋلەرى ءتيىس.
دايىنداعان: نۇربول نۇرماحان ۇلى
