نۇرلان بەكجانوۆ وليمپيادا جۇلدەگەرى اقجۇرەك تاڭاتاروۆتى تىزە بۇكتىردى

ورال. قازاقپارات - تاراز قالاسىندا كورنەكتى مەملەكەت جانە قوعام قايراتكەرى دىنمۇحامەد قونايەۆتى ەسكە الۋعا ارنالعان ەركىن كۇرەستەن ەرەسەكتەر اراسىندا وتكەن حالىقارالىق تۋرنيردە باتىس قازاقستاندىق بالۋان نۇرلان بەكجانوۆ جەڭىمپاز اتاندى.

ب ق و دەنە شىنىقتىرۋ جانە سپورت باسقارماسىنىڭ باسپا ءسوز قىزمەتىنەن تۇسكەن مالىمەتكە قاراعاندا، اتالمىش جارىسقا وزبەكستان، موڭعوليا، قازاقستان، قىرعىزستان، يتاليا، يران، گرۋزيا، تاجىكستان، ۋكراينا ەلدەرىنەن 120 داي سپورتشى قاتىسىپ، 57 دەن 125 كەلىگە دەيىنگى سالماق دارەجەلەرىندە كۇش سىناسقان.

ايتا كەتەيىك، 70 كەلى سالماقتا بوز كىلەمگە شىققان نۇرلان لوندون وليمپياداسىنىڭ قولا جۇلدەگەرى اقجۇرەك تاڭاتاروۆتى تىزە بۇكتىرگەن. وسى سالماقتا جۇلدەگەر اتانعانداردىڭ ءبارى دە - قازاقستاندىقتار. دانيار قايسانوۆ كۇمىس جۇلدەنى جەڭىپ السا، بولات ساقايەۆ پەن سوتنە باراميدزە ءۇشىنشى ورىندى ءبولىستى.