قاشاعان شىعىنىن مەردىگەر كومپانيا كوتەرەدى

استانا. قازاقپارات - قاشاعاننىڭ شىعىنى مەردىگەر كومپانيانىڭ موينىنا تۇسەدى. بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە مۇناي جانە گاز ءمينيسترى ۇزاقباي قارابالين وسىلاي مالىمدەدى.

«كەلىسىم بويىنشا قاشاعان كەن ورنىنىڭ ىسكە قوسىلماعاندىعى ءۇشىن ءاربىر توقسان سايىن كومپانيالار 30 ميلليون دوللار ەل ۇكىمەتىنە تولەپ تۇرادى. بۇل ايىپپۇل سول قالپىندا تۇرادى. ونىڭ ۇستىنە قايتا جوندەۋ، قۇبىرلاردى قايتا سالۋ جۇمىستارىنىڭ ءبارى قازاقستان مۇنايىنىڭ باعاسىمەن وتەلمەيدى، كەرىسىنشە مەردىگەرلەردىڭ ءوز موينىنا تۇسەدى»، - دەدى ۇزاقباي قارابالين.

ەسكە سالا كەتەيىك، قاشاعان كەنىن يگەرۋ بارىسىندا گاز جانە مۇناي قۇبىرلارىنىڭ قوسىلعان تۇسىندا جارىقشاق پايدا بولىپ، يگەرۋ جۇمىسى توقتاتىلعان ەدى. ءمينيستردىڭ مالىمەتىنە قاراعاندا، بۇل دانەكەرلەۋ تەحنولوگياسىنىڭ دۇرىس تاڭدالماۋىنان نەمەسە ونى ورىنداۋشىلاردىڭ تەحنولوگيانى دۇرىس اتقارا الماعاندىعىنان بولۋى ىقتيمال. ال مەردىگەرلەردىڭ قۇبىردىڭ ىشكى جاعىنا جاساعان دياگنوستيكاسى مۇناي جانە گاز قۇبىرى تولىعىمەن اۋىستىرۋدى قاجەت ەتەتىندىگىن انىقتادى. بۇل رەتتە ەكى قۇبىردى تولىعىمەن اۋىستىرۋ ءۇشىن قوسىمشا 200 شاقىرىمدىق قۇبىرلار ساتىپ، ونى توسەۋ جۇمىستارى اتقارىلاتىن بولادى.

اۆتور: قانات مامەتقازى ۇلى