مۇناي جانە گاز ءمينيسترى قاشاعان كەنىندە مۇناي وندىرىلەتىن مەرزىمدى اتادى

استانا. قازاقپارات - بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە مۇناي جانە گاز ءمينيسترى ۇزاقباي قارابالين قاشاعان كەن ورنىندا مۇناي ءونىمى ءوندىرىلۋى ىقتيمال ەكى مەرزىمدى اتادى.

«بۇگىنگى كۇنى قاشاعانعا بايلانىستى جوندەۋ-قالپىنا كەلتىرۋ جۇمىستارىنىڭ سەناريى مەن ءونىم ءوندىرۋدى قالپىنا كەلتىرۋدىڭ ءبىرقاتار بولجامى جاسالىپ وتىر. جالپى بىزدە ەكى نۇسقا بار. ونىڭ ىشىندە وپتيميستىك باعىت بويىنشا كەن ورنىنداعى مۇناي يگەرۋ 2016 -جىلدىڭ ءبىرىنشى جارتى جىلدىعىنا تۋرا كەلەدى. ال ەكىنشى نۇسقاعا، گاز قۇبىرىنىڭ تولىق قۇرىلىسىن اياقتاۋدى ەسەپكە الا وتىرىپ جۇگىنسەك، 2016 - جىلدىڭ ەكىنشى جارتىسىنا ءدوپ كەلۋى مۇمكىن. دەگەنمەن، بۇل ناقتى داتا ەمەس، مالىمەتتەر وزگەرۋى مۇمكىن»، - دەدى مينيستر.

ونىڭ ايتۋىنشا، گاز جانە مۇناي قۇبىرلارىنىڭ قوسىلعان تۇسىندا جارىق كەتكەن، بۇل دانەكەرلەۋ تەحنولوگياسىنىڭ دۇرىس تاڭدالماۋىنان نەمەسە ونى ورىنداۋشىلاردىڭ تەحنولوگيانى دۇرىس اتقارا الماعاندىعىنان بولۋى ىقتيمال.

«مەردىگەرلەردىڭ قۇبىردىڭ ىشكى جاعىنا جاساعان دياگنوستيكاسى مۇناي جانە گاز قۇبىرى تولىعىمەن اۋىستىرۋدى قاجەت ەتەتىندىگىن انىقتادى. ال ەكى قۇبىردى تولىعىمەن اۋىستىرۋ ءۇشىن قوسىمشا 200 شاقىرىمدىق قۇبىرلار ساتىپ، ونى توسەۋ جۇمىستارىنىڭ اتقارىلۋى تيىستىگىن كورسەتەدى» - دەدى مينيستر.

اۆتور: قانات مامەتقازى ۇلى