تۇرعىن ءۇي قۇرىلىس جيناق بانكى كليەنتتەرى ءۇشىن ءبىرقاتار كوميسسيانى الىپ تاستادى

استانا. قازاقپارات - «قازاقستان تۇرعىن ءۇي قۇرىلىس جيناق بانكى» ا ق كليەنتتەرى تولەۋى ءتيىس ءبىرقاتار كوميسسيانى الىپ تاستادى، دەپ حابارلادى «بايتەرەك» حولدينگىنىڭ باسقارما ءتوراعاسى قۋاندىق بيشىمبايەۆ.

«ەلباسىنىڭ تاپسىرماسىمەن تۇرعىن ءۇي قۇرىلىس جيناق بانكىندە ءبىرقاتار كوميسسيا الىنىپ تاستالدى. كليەنتتەر ءۇشىن قارجىلاي جۇك سالماعى % 30 قىسقاردى. تۇرعىن ۇيلەردەن پاتەر ساتىپ الۋشىلار پۋلدارىنا قاتىسۋعا وتىنىشتەرىن ءبىلدىرۋ ءۇشىن تولەيتىن كوميسسيا، باعدارلاماعا قاتىسۋشىنىڭ ستاتۋسى تۋرالى قوسىمشا كەلىسىم جاساۋ ءۇشىن تولەنەتىن كوميسسيا جويىلدى. كليەنتتىڭ باستاماسىمەن جينالعان قارجى تۋرالى شارتتاعى تالاپتاردى وزگەرتۋ تۋرالى قوسىمشا كەلىسىم دە تەگىن جاسالاتىن بولدى.

بۇرىن بۇل ۇردىستەر ءۇشىن كليەنت 5 مىڭ تەڭگەدەن تولەيتىن. سونىمەن بىرگە مۇلىكتى ساتىپ الۋ/ساتۋ كەزىندە نوتاريۋستىڭ قىزمەتى بۇرىن 22 مىڭ تەڭگە بولسا، قازىر جاڭا كەلىسىم بويىنشا ول 7 مىڭ تەڭگەدەن اسپايدى»، - دەدى ق. بيشىمبايەۆ «كازاحستانسكايا پراۆدا» گازەتىنە بەرگەن سۇحباتىندا.

ونىڭ دەرەكتەرىنە قاراعاندا، تۇرعىن ءۇي قۇرىلىس جيناق جۇيەسىنە بەلسەندى قاتىسۋشىلار سانى 2014 - جىلى % 4,25 ۇلعايدى. «ماقساتىمىز - جىل سوڭىنا دەيىن بۇل كورسەتكىشتى % 5 دەيىن جەتكىزۋ. بۇگىندە تۇرعىن ءۇي قۇرىلىس جيناق بانكى كوپ مەرزىمدىك سالىمدار بويىنشا ءبىرىنشى ورىندا»، - دەدى حولدينگ باسشىسى.

ونىڭ سوزىنە قاراعاندا، «قازاقستاندىق يپوتەكالىق كومپانيا» ا ق يپوتەكالىق نەسيەلەردى الۋ ءۇردىسىن بەلسەندى جۇرگىزىپ ونى 50 ميلليارد تەڭگەگە دەيىن جەتكىزگەن. «وتكەن ماۋسىمدا، بانكتەر يپوتەكالىق نارىقتا بەلسەندىلىكتەرىن باسەڭدەتكەندە، ءبىز دامۋ ينستيتۋتتارى تاراپىنان بەلسەندىلىكتى ارتتىرۋدى ءجون كوردىك. قازىرگى تاڭدا تۇرعىن ءۇي قۇرىلىس جيناق بانكى مەن قازاقستاندىق يپوتەكالىق كومپانيانىڭ باسپانانى قارجىلاندىرۋ نارىعىنداعى ۇلەسى % 23 استى»، - دەدى ق. بيشىمبايەۆ.