تىكەلەي ەفير كەزىندە س ن ن ءتىلشىسى زەڭبىرەك سوققىسىنان قورعاندى - كەسكىن

استانا. قازاقپارات - گازا سەكتورىنان تىكەلەي رەپورتاج جاساپ تۇرعان CNN تەلەارناسىنىڭ ءتىلشىسى كارل پەنحاۋل ەفير بارىسىندا تۋ سىرتىنان اتىلعان زەڭبىرەكتەن قورعانىپ، كامەرادان شىعىپ كەتتى.

24.kz ارناسىنىڭ ۆاشينگتونداعى مەنشىكتى ءتىلشىسى جىگەر سارسەننىڭ حابارلاۋىنشا، جۋرناليست تاياۋ شىعىستاعى قاقتىعىس ايماعىنان CNN-نىڭ جاڭالىقتار ستۋدياسىمەن تىكەلەي بايلانىسقا شىققان.

ا ق ش ستۋدياسىنا تۇندە سول ايماقتا جويقىن سوققىلار جاسالعاندىعى جايىندا اڭگىمەلەپ جاتقان تۇستا كەنەتتەن الىستان اتىلعان زەڭبىرەك وعى ونىڭ stand-up مەكەنىنەن الىس ەمەس جەردەگى كوپقاباتتى تۇرعىن ۇيلەردىڭ ءبىرىن كۇل-تالقان ەتتى.

تۋ سىرتىنداعى جارىلىستان سەكەم العان كارل پەنحاۋل ءسوزىن توقتاتا سالىسىمەن، سول بويدا جاسىرىنىپ ۇلگەردى. ال توسىن ءساتتى پايدالانعان ونىڭ وپەراتورى، جارىلىس بولعان جەردى جاقىنىراق كورسەتە تۇسۋگە تىرىستى.

الايدا جۋرناليست وزىنە بوي تاسالايتىن ورىن تاۋىپ الۋىن ەسكەرتە وتىرىپ، ستۋديامەن بايلانىستى ۇزگەن جوق. كەرىسىنشە جۇرگىزۋشىنىڭ ءدال وسى وقيعاعا بايلانىستى قويعان ساۋالدارىنا كامەرادان تىس تۇسىنىكتەمە جاساپ، مەيىلىنشە مولىراق اقپارات بەرە ءتۇستى.

ايتا كەتسەك، كارل پەنحاۋل -  CNN تەلەارناسىنىڭ لاتىن امەريكاسى، تاياۋ شىعىس جانە ەۋروپا بويىنشا حالىقارالىق ءتىلشىسى. كوبىنەسە ەسىرتكى ساۋداسى، قارۋلى قاقتىعىستار جانە تابيعي اپاتتارعا قاتىستى رەپورتاجدار جاساۋعا بەيىمدەلگەن.

24.kz