ەرتىس وڭىرىنەن ميلليونداعان جىلدار بۇرىنعى جانۋارلاردىڭ سۇيەكتەرى تابىلدى

استانا. قازاقپارات - ەرتىس ءوڭىرىنىڭ جاڭاقالا اۋىلى ماڭىنان ميلليونداعان جىلدار بۇرىن سول ايماقتى مەكەندەگەن ەجەلگى جانۋارلاردىڭ سۇيەكتەرى تابىلدى.

جاس شاماسى 2 ميلليون جىلعا جۋىقتايتىن بارلىعى 19 سۇيەك انىقتالدى.

ولار مارال، بيزون، بۇعى، ءتىپتى ءزىلدىڭ قالدىعى بولۋى دا مۇمكىن.

ءوڭىردىڭ وتكەن تاريحىنان سىر شەرتەتىن كونە جادىگەرلەردى پاۆلودار گەوگرافيا ءۇيىنىڭ وكىلدەرى «جولدار» بايك-كلۋبى مۇشەلەرىمەن بىرلەسكەن ەكسپەديتسيا بارىسىندا تاپقان.

بۇدان باسقا پاۆلودار گەوگرافيا ءۇيىنىڭ قورى ەجەلگى ادامدار قولدانعان تاس قۇرالدارمەن تولىقتى. زەرتتەۋ ساپارىنا جەتەكشىلىك ەتكەن گريگوري پوتانين اتىنداعى تاريحي-ولكەتانۋ مۋزەيىنىڭ ءبولىم باسشىسى گەورگي پەرەسۆەتوۆ جادىگەرلەرگە قاتىستى عىلىمي تۇجىرىمداما جاسادى.

ال پاۆلودار گەوگرافيا ءۇيىنىڭ ديرەكتورى الەكساندر ۆەرۆەكين جاڭاقالا اۋىلىن ارنايى تاڭداعاندارىن ايتادى. ويتكەنى بۇل ەلدى مەكەننەن ەجەلگى تاس داۋىرىنە جاتاتىن دۇنيەلەر بۇرىن دا تابىلعان ەكەن. ەرتىس وزەنى جاعانى قاتتى شايىپ وتكەن كەزدە كونە جادىگەرلەر سىرتقا شىعىپ قالعان.

الەكساندر ۆەرۆەكين، پاۆلودار گەوگرافيا ءۇيىنىڭ ديرەكتورى:

- ءبىزدى جانە ءبىزدىڭ ارىپتەستەرىمىزدىڭ بارلىعىن كوپتەگەن جىلداردان بەرى ولكەمىزدىڭ ەجەلگى وتكەن تاريحى قىزىقتىرادى. بۇل تابىلىپ وتىرعان جانۋارلاردىڭ سۇيەكتەرىنە شامامەن 2 ميلليون جىل بولعان. ولار جەردىڭ استىڭعى قىرتىسىندا جاقسى ساقتالىپ، بۇگىنگە جەتكەن.

khabar.kz