فيلمدەگى «باۋىرجان مومىش ۇلى» وتباسىن قۇردى

استانا. قازاقپارات - قازاقتىڭ باتىر ۇلىنىڭ قايسار ءومىر جولى تۋرالى تۇسىرىلگەن «باۋىرجان مومىش ۇلى» فيلمىندە باستى ءرولدى ويناعان اكتەر ەركەبۇلان دايىروۆ شاڭىراق كوتەردى.

28 جاستاعى اكتەردىڭ تاڭداعان جارى 26 جاسار ءلايلا تىلەۋوۆا دا ونەر يەسى ەكەن.

ءبىرقاتار قازاقستاندىق تەلەحيكايالارعا ءتۇسىپ ۇلگەرگەن ءلايلا تىلەۋوۆا م. اۋەزوۆ اتىنداعى تەاتردىڭ ساحناسىنداعى قويىلىمداردا كوپشىلىك نازارىنا ىلىگىپ ءجۇر، دەپ جازادى lady.mail.ru.

ايتا كەتەيىك، ەركەبۇلان اقان ساتايەۆتىڭ فيلمىندە باتىر اتاسىنىڭ بەينەسىن سومداۋ ارقىلى تانىمال بولعان ەدى. وسى ءرولى ءۇشىن ول «نامىس» مەدالىمەن ماراپاتتالدى.

الەكساندر بەكتىڭ «ۆولوكولام تاس جولى» اتتى تۋىندىسى بويىنشا تۇسىرىلگەن «باۋىرجان مومىش ۇلى» كوركەم فيلمىندە سوعىستىڭ قيىن-قىستاۋ كۇندەرىندە باتىردىڭ باسىنان كەشكەندەرى باياندالادى.