08:51, 30 - شىلدە 2014 | GMT +5
بۋراباي كۋرورتى تانىمال دەمالىس ايماقتارىنىڭ ۇشتىگىنە ەندى
استانا. قازاقپارات - بۋراباي كۋرورتى بۇرىنعى كەڭەس وداعى ەلدەرىنىڭ ىشىندەگى رەسەيلىك تۋريستەر جازعى دەمالىسىن وتكىزەتىن ايماقتاردىڭ تانىمال ۇشتىگىنە ەندى.
Oktogo.ru سەرۆيسىنىڭ حابارلاۋىنشا، رەيتينگ وسى جازداعى دەمالىس ورىندارىنا بارۋدى برونداۋ مالىمەتتەرىنىڭ نەگىزىندە قۇراستىرىلعان. وعان ءبىر اپتا بويى تۇراتىن بولمەنىڭ، تاماقتانۋ مەن ەكسكۋرسيالاردىڭ قۇنىن قوسقاندا 25 مىڭ رۋبلدەن اسپايتىن، ءارى سول ەلدەردىڭ استانالارىنان ءۇش ساعاتتان ارتىق ۋاقىتتى المايتىن قاشىقتىقتا ورنالاسقان شيپاجايلار جاتقىزىلعان.
اتالمىش كورسەتكىشتەر بويىنشا العاشقى ۇشتىككە قىرعىزستانداعى ىستىقكول، قازاقستانداعى بۋراباي ايماعى جانە بەلارۋستەگى ناروچ كولى ەنگەن.
ەل استاناسىنان كولىكتىڭ نەبارى ەكى ساعاتتاي ۋاقىتى جۇمسالاتىن قاشىقتىقتا ورنالاسقان بۋراباي ءوڭىرى كولدەرگە، تاۋلار مەن قاراعايلى ورماندارعا اسا باي. مۇنداعى ساناتوريلىك- كۋرورتتىق ينفراقۇرىلىمدار اسىرەسە جاز ايلارىندا ءبىر بوسامايدى.
