ساددام حۋسەيننىڭ تۋىسى تاجىكستان بيلىگىنەن ساياسي باسپانا سۇرادى

استانا. قازاقپارات - ءوزىن يراكتىڭ بۇرىنعى پرەزيدەنتى ساددام حۋسەيننىڭ تۋىسى رەتىندە اتاعان ادام، تاجىكستاننان ساياسي باسپانا سۇرادى، دەپ حابارلايدى ينتەرفاكس اگەنتتىگى سول ەلدىڭ ىشكى ىستەر مينيسترلىگىنە سىلتەمە جاساپ.

ءوزىن ابدۋللا يبن احماد ءال ارابيا دەپ تانىستىرعان بەلگىسىز مەملەكەتتىڭ ازاماتى اۋعان-تاجىك شەكاراسىن كەسىپ ءوتىپ، تاجىك بيلىگى تاراپىنان ساياسي باسپانا سۇراعان.

«ەشقانداي دا قۇجاتى جوق ازامات ءوزىن يراكتىڭ بۇرىنعى پرەزيدەنتى ساددام حۋسەيننىڭ تۋىسىمەن دەپ سانايدى جانە يراكتىڭ بۇگىنگى بيلىگى تاراپىنان ونىڭ ىزىنە ءتۇسۋىن نەگىزگە الىپ، ساياسي باسپانا سۇرايدى»، - دەلىنگەن حابارلامادا.

دەگەنمەن، اقپاراتتا اتالعان ازامات يراك ەكس-پرەزيدەنتىنىڭ قانداي تۋىسى ەكەندىگى ايتىلمايدى. تاجىكستان ىشكى ىستەر مينيسترلىگىنىڭ مالىمەتىنە قاراعاندا، شەكارانى كەسىپ وتكەن ول ازامات 1967 - جىلى تۋعان، پارسى جانە اراب تىلدەرىندە جاقسى سويلەيدى.

«تاجىكستان ءىء ى م اتالعان ازاماتتان الىنعان مالىمەتتەردى تەكسەرۋدە، جانە تەكسەرۋ ناتيجەلەرى بويىنشا ساياسي باسپانا بەرۋ نەمەسە ودان باس تارتۋ تۋرالى تۇپكىلىكتى شەشىم شىعارماق»، - دەلىنگەن تاراتىلعان اقپاراتتا.

ەسكە سالا كەتەيىك، يراك پرەزيدەنتى س. حۋسەين مەملەكەتتى 1979 - جىلدان 2003 - جىلعا دەيىن باسقارعان بولاتىن. ول يراكتىڭ جوعارعى قىلمىستىق تريبۋنالىنىڭ شەشىمىمەن 2006 - جىلدىڭ 30 - جەلتوقسانىندا دارعا اسىلعان.

اۆتور: قانات مامەتقازى ۇلى