التى جاسار اكروبات بالا رەكورد ورناتتى - كەسكىن/فوتو

استانا. قازاقپارات - الەم رەكوردىن جاسى كەلىپ، تولىسقان جاندار عانا ەمەس، كىشكەنتاي بالالار دا ورناتا الادى.

ءۇندىستاننىڭ بانگالور قالاسىندا تۇراتىن 6 جاسار بالا گاگان ساتيش ەرەكشە ونەرىمەن تانىلىپ، الەم رەكوردىنا قول جەتكىزىپ وتىر، دەپ جازادى massaget.kz.

ليمبو- سكەيتينگ دەپ اتالاتىن ەرەكشە سپورت تۇرىمەن اينالىساتىن بالا بۇل جەتىستىككە جەتۋ ءۇشىن 3 جىل دايىندالىپتى. ول قاتار تۇرعان 39 اۆتوكولىكتىڭ استىمەن روليكتى كونكي ارقىلى 29,8 سەكۋندتا زۋلاپ وتكەن. الداعى ۋاقىتتا جاس اكروبات 100 اۆتوكولىكتىڭ استىنان ءبىر ۋاقىتتا ءوتۋدى جوسپارلاپ وتىر ەكەن.

ليمبو-سكەيتينگ - ەڭ ەرەكشە ەكسترەمالدى سپورت تۇرلەرىنىڭ قاتارىنا جاتادى. ياعني، باستى ماقساتى - روليكتى كونكي ارقىلى اۆتوكولىكتەردىڭ استىنان زۋلاپ ءوتۋ. بۇل سپورت ءتۇرىن ويلاپ تاپقان دا ۇندىلىك چينداك انيكەت ەسىمدى جاس ءوسپىرىم ەكەن. ول رەسمي ەمەس رەكوردى بويىنشا قاتار تۇرعان 57 اۆتوكولىكتىڭ استىنان قينالماي وتكەن.

ءبىر قىزىعى، ەرەكشە تالانتتى بالانىڭ ونەرى جەرگىلىكتى جۇرگىزۋشىلەر مەن جول پوليتسياسىن مازالاپ وتىر ەكەن. ولار قىزىعۋشىلىعى ءۇشىن تاۋەكەلگە باراتىن بالانىڭ ومىرىنە الاڭدايتىندىقتارىن جەتكىزگەن.