يراننىڭ جوعارى كوشباسشىسى: يزرايلدىڭ پالەستينا حالقىنا جاساپ وتىرعانى - گەنوتسيد

ءابۋ-دابي. قازاقپارات - يراننىڭ جوعارى كوشباسشىسى اياتوللا الي حامەنەي سەيسەنبىدە گازا سەكتورىنداعى تەل-اۆيۆتىڭ وپەراتسياسىنا بايلانىستى يزرايلدىڭ اتىنا ايىپتار تاقتى.

اتاپ ايتقاندا، يراندىق رۋحاني كوشباسشى يزرايلدى «قاڭعىباس يتكە» بالادى، ول اتالمىش مەملەكەتتى گازادا ناسىلگە بولىنۋشىلىككە بوي ۇردى دەپ ايىپتادى.

بۇدان باسقا، الي حامەنەي كۇللى يسلام الەمىن پالەستينالىقتاردى قارۋلاندىرۋعا شاقىردى.

«يد ال-فيتر» مۇسىلمان مەرەكەسىندە ءسوز سويلەگەندە الي حامەنەي: «ول بەيبىت ەلگە شابۋىل جاساعان قاڭعىباس ءيت، جىرتقىش قاسقىرمەن تەڭ. ادامزات يزرايلدىڭ تەرىس ارەكەتىن مويىنداتۋى ءتيىس. بولىپ جاتقان جاعداي، تاريحي اۋقىمداعى سۇمدىق وقيعا»، - دەدى.

«سۋى، جارىعى جوق الاقانداي جەرگە قامالعان ادامداردى مۇزداي قارۋلانعان اسكەر تەگەۋرىنى ۇستاپ وتىر. پالەستينالىقتار بىزگە ۇلكەن ساباق اكەلدى»، - دەدى ول.

ەسكە سالا كەتەيىك، ءۇش اپتادان بەرى يزرايلدىڭ «مىزعىمايتىن قابىرعا» وپەراتسياسىنان 1100دەن استام پالەستينالىقتار، 53 يزرايلدىكتەر قازا تاپتى.

بۇل رەتتە اياتوللا الي حامەنەي گازا سەكتورىنداعى جانجالدىڭ توقتاعانى تۋرالى اڭگىمەنى جوققا شىعاردى، ول «بۇل قۇراما شتاتتار مەن ەۋروپالىق مەملەكەتتەر تاراپىنان يزرايلدى قۇتقارۋعا باعىتتالعان تۇزاق» دەدى. يران كوشباسشىسىنىڭ ايتۋىنشا، حاماس قايتا قارۋلانۋى ءتيىس، ولاي بولماعان جاعدايدا، پالەستينالىق قوزعالىس ءوز-ءوزىن قورعاي المايدى.

الي حامەنەيدىڭ ءسوزى يرانداعى حالىقتىڭ پىكىرىمەن پالەستيندىكتەردى قولداۋ جاعىنان، يزرايلدىڭ گازا سەكتورىنداعى اسكەري ارەكەتتەرىنە قارسى سايكەس كەلدى.