مەملەكەتتىك ءتىلدى مەڭگەرۋى ءتيىس كاسىپتەر، ماماندىقتار مەن لاۋازىمداردىڭ تىزبەسى بەكىتىلمەي وتىر
ەسەپ كوميتەتىنىڭ باعالاۋىنشا، ارالىق كەزەڭدە مەملەكەتتىك باعدارلامانى ىسكە اسىرۋ جەتكىلىكتى دارەجەدە ءتيىمدى جۇزەگە اسىرىلماعان. «ونى ىسكە اسىرۋ بويىنشا ءىس-شارالاردى جوسپارلاۋ كەزەڭىندە تۇپكىلىكتى ناتيجەلەرگە قول جەتكىزۋگە تيىسىنشە تالداۋ جۇرگىزىلمەگەنى دە انىقتالدى. بۇل مەملەكەتتىك باعدارلامانىڭ ءبىرىنشى كەزەڭىندەگى 7 نىسانالى ينديكاتوردىڭ 5 ۋىنە، كۇتىلىپ وتىرعان ناتيجەلەردىڭ 11 كورسەتكىشىنىڭ 8 ىنە قول جەتكىزبەۋگە اكەپ سوقتىرعان»، - دەلىنەدى باسپا ءسوز بايانىندا.
بۇدان بولەك، ەسەپ كوميتەتى «قازتەست» باعدارلاماسى جەتكىلىكتى دارەجەدە ءتيىمدى تۇردە ەنگىزىلمەي وتىرعانىن دا العا تارتادى. «بەلگىلەنگەن كولەمدە جانە بىلىكتىلىك تالاپتارىنا سايكەس مەملەكەتتىك ءتىلدى مەڭگەرۋى قاجەت كاسىپتەردىڭ، ماماندىقتاردىڭ جانە لاۋازىمداردىڭ تىزبەسى بەكىتىلمەگەن. جۇرگىزىلىپ وتىرعان مەملەكەتتىك اقپاراتتىق ساياساتتىڭ تيىمدىلىگى مەن ناتيجەلىلىگىن انىقتاۋدىڭ ادىستەمەسى جوق. سونىمەن قاتار، بۇل سالادا انىقتالعان بيۋدجەت جانە وزگە دە زاڭناما بۇزۋشىلىقتارىنىڭ جالپى سوماسى 2,6 ميلليارد تەڭگەنى قۇراسا، 459,5 ميلليون تەڭگە ءتيىمسىز پايدالانىلعان»، - دەلىنگەن باسپا ءسوز حابارلاماسىندا.
وسىعان وراي، ەسەپ كوميتەتى مادەنيەت مينيسترلىگىنە انىقتالعان كەمشىلىكتەردى جويۋ، قولدانىستاعى زاڭنامانىڭ بۇزىلۋىنا جول بەرگەن لاۋازىمدى ادامداردىڭ جاۋاپتىلىعىن قاراۋ بويىنشا شارالار قابىلداۋدى، سونداي-اق تىلدەردى دامىتۋ مەن قولدانۋدىڭ 2011 - 2020 - جىلدارعا ارنالعان مەملەكەتتىك باعدارلاماسى ينديكاتورلارىنىڭ ءمانىن وزەكتى ەتۋدى تاپسىرادى.
اۆتور: قانات مامەتقازى ۇلى
